“Gafa”, në web-in e Presidencës, Berisha ende opozitar

Valentina Madani

Web-i, Topi “njeh” Berishën President, por jo Kryeministër

Një klikim mbi web-et e institucioneve të ndryshme shtetërore, ka dhe befasitë e veta. Teksa mausin e ndalon mbi biografitë e shtetarëve dhe administratës, në pamje të pamje të parë të jepet përshtypja sikur ata janë zyrtarë të Shtëpisë së Bardhë. Kjo, për faktin se CV-të e publikuara janë aq të gjata dhe të mbingarkuara, sa rëndom lexon tek to edhe llojet e seminareve që kanë kryer. Por në rastin e publikimit të biografisë së Sali Berishës, kur ishte kryetar i shtetit, ka ndodhur e kundërta. Në rastin e z. Berisha, kemi të bëjmë me një gafë, pasi figuron të jetë “e varfër”, e paplotë dhe me mungesë të dhënash. Aktiviteti i tij politik mbetet deri tek pozicioni kur ishte kryetar i Partisë Demokratike gjatë kohës së qëndrimit në opozitë. Harresë apo neglizhencë, sido që të jetë, tingëllon keq, teksa sheh se Presidenca aktuale e Bamir Topit ka përfshirë emrat dhe të dhënat e paraardhësve, por ka harruar ta pasurojë biografinë e politikanit me peshën më të madhe në vend, atë të Sali Berishës. Presidenca e Topit është treguar mjaft korrekte me radhitjen e të gjithë krerëve të shtetit shqiptar, shoqëruar me CV-të përkatëse, në një nga rubrikat e faqes zyrtare të institucionit që ai drejton. Por ngjan sikur ai nuk njeh rezultatin e zgjedhjeve parlamentare të 2005-s, që sollën në pushtet z. Berisha, i cili u mandatua si Kryeministri i ri i Shqipërisë. Po ashtu, duket se z. Topi nuk njeh as rezultatin e zgjedhjeve të 28 qershorit të vitit të kaluar, përmes të cilave z. Berisha u rikonfirmua si kryetar i qeverisë së Shqipërisë. Biografia e tij në web-in e Presidencës së z. Topi ka mbetur në momentin kur ishte kryetar i opozitës, duke drejtuar partinë më të madhe të saj, atë të PD-së, pa u kujtuar se Sali Berisha pas 8 viteve të gjata në opozitë, u rikthye në pushtet, të cilin ia besuan zgjedhësit shqiptarë 5 vitet e fundit. Nisur nga kjo, të krijohet përshtypja se Bamir Topi njeh Berishën President, por jo Kryeministër, sepse i tillë figuron në faqen zyrtare të kreut të shtetit. Të dhënat për Berishën President janë gjysmake dhe nuk dihet ende se kur do të plotësohen. Por, paradoksi është se në rastet e tjera, jo rrallë ndesh CV shtetarësh që ngjajnë sikur janë presidentë të SHBA-së dhe jo të Shqipërisë. Presidenca ka plotësuar mësë miri publikën e presidentëve por duke u treguar e pakujdesshme dhe aspak koherente me pozicionet e reja të kryeministrit të Shqipërisë Sali Berisha që nuk u mandatua dje në këtë post por plot 5 vjet më parë.

Sali Berisha sipas web-it të Bamir Topit

Lindi më 15 tetor 1944 në Tropojë. U diplomua në Universitetin e Tiranës, Fakulteti i Mjekësisë (1967). Pasi përfundoi me sukses studimet e avancuara në Paris (Francë) drejtoi një program kërkimor në Hemodinamikat. Më 1986 u zgjodh anëtar i Komitetit Evropian për Kërkime në Shkencat Mjekësore.

Gjatë viteve të mësimdhënies në UT (1980-90), zoti Berisha publikoi libra studimorë, tekste universitare dhe shumë artikuj shkencorë në fushën e kardiologjisë brenda dhe jashtë vendit. Zoti Berisha mban titullin shkencor “Profesor Doktor”. Karriera politike e zotit Berisha nisi me lëvizjen studentore të dhjetorit 1990. Më parë ai u bë i njohur me kritikat e tij publike ndaj sistemit të vjetër dhe kërkesën për demokratizim të vendit.

Më 1991 zoti Berisha u zgjodh kryetar i Partisë Demokratike, për t’u rizgjedhur edhe më 1997 e në vazhdim. Është zgjedhur deputet në Kuvendin e Shqipërisë më 1991, 1992, 1997, 2001. Pas fitores në zgjedhje të koalicionit opozitar të drejtuar prej tij, zoti Berisha më 9 prill 1992 u zgjodh President i Republikës, detyrë në të cilën u rizgjodh edhe më 3 shkurt 1997. Dha dorëheqje nga posti i Presidentit një muaj pas humbjes në zgjedhje të PD-së dhe fitores së koalicionit të majtë. Që atëherë është kryetar i PD-së, partia më e madhe në opozitë.

Historia presidenciale që nis me Ismail Qemalin

Që nga krijimi i shtetit shqiptar, më 28 nëntor 1912, Shqipëria ka provuar disa modele qeverisjeje, përfshirë protektoratin ndërkombëtar, monarkinë, regjimin e partisë-shtet si dhe republikën parlamentare. Gjatë kësaj periudhe, funksioni i Presidentit të Republikës dhe i Kryetarit të Shtetit është ushtruar në forma të ndryshme.

Më 1912, u krijua qeveria e parë me Ismail Qemalin në krye, e cila kishte edhe kompetencat e Kryetarit të Shtetit. Më 6 shkurt 1914, Konferenca e Ambasadorëve emëroi Princin Wilhelm Wied si Kryetar të Shtetit shqiptar. Në periudhën shtator 1914 - janar 1920 Shqipëria u bë shesh lufte, duke ndërruar disa qeveri, ku detyra e Kryetarit të Shtetit u mbulua nga qeveri-regjenca të ndryshme. Më 8 janar 1920, Kongresi i Lushnjës zgjodhi Këshillin e Lartë prej 4 vetash, i cili do të kryente funksionet e Kryetarit të Shtetit, duke rikthyer parlamentarizmin. Në vitin 1924, Fan Noli u zgjodh kryetar i qeverisë, duke ushtruar edhe funksionet e Kryetarit të Shtetit. Pas ndryshimeve të shpeshta në qeverisje, më 31 janar 1925, Asambleja Kombëtare miratoi formën republikane të regjimit dhe votoi Ahmet Zogun si President të Republikës. Më 1 shtator 1928 Shqipëria u shpall Monarki dhe Ahmet Zogu u shpall Mbret i Shqiptarëve. Pas pushtimit të Shqipërisë nga Italia në prill 1939 dhe bashkimit të dy vendeve, Viktor Emanueli III u bë Mbret i Shqipërisë. Vitet 1943-44 nën pushtimin gjerman rikthejnë qeverisjet-regjenca.

Përfundimi i Luftës së Dytë Botërore dhe çlirimi i Shqipërisë më 1944 u shoqërua me zgjedhjet e para parlamentare të dhjetorit vitit 1945 dhe me kalimin e funksionit të Kryetarit të Shtetit në organ kolegjial, si Presidium i Kuvendit Popullor. Në periudhën 11 janar 1946 - 12 dhjetor 1990, gjatë të cilës Shqipëria përjetoi diktaturën komuniste, funksionet e Kryetarit të Shtetit u kryen nga Omer Nishani (10 janar 1946 - 1 gusht 1953), Haxhi Lleshi (1 gusht 1953 - 22 nëntor 1982) dhe Ramiz Alia (22 nëntor 1982 - 22 shkurt 1991). Më 22 shkurt 1991, u krijua Këshilli Presidencial i drejtuar nga Ramiz Alia, i cili i ushtroi funksionet deri më 30 prill 1991.

Të gjithë paraardhësit e Topit

Më 30 prill 1991, me zgjedhjen e Presidentit të parë të republikës parlamentare nga ana e një parlamenti shumëpartiak, krijohet institucioni kushtetues i Presidentit të Republikës. Që nga kjo datë dhe deri më sot presidentët dhe periudhat e drejtimit të tyre janë si më poshtë:

30 prill 1991: Parlamenti zgjedh President të Republikës zotin Ramiz Alia

9 prill 1992: Parlamenti zgjedh President të Republikës zotin Sali Berisha

3 mars 1997: Parlamenti rizgjedh President të Republikës, zotin Sali Berisha

24 korrik 1997 : Parlamenti zgjedh President të Republikës zotin Rexhep Meidani

24 korrik 2002 : Parlamenti zgjedh President të Republikës zotin Alfred Moisiu

24 korrik 2007 : Parlamenti zgjedh President të Republikës zotin Bamir Topi

standart

“Gafa”, në web-in e Presidencës, Berisha ende opozitar

“Gafa”, në web-in e Presidencës, Berisha ende opozitar

“Gafa”, në web-in e Presidencës, Berisha ende opozitar :: Komentet