Gjykata pranon dokumentet, Gurakuqi: Merr fund spekulimi i Ndokës

Nga Armand Maho

Pas pranimit nga gjykata e Tiranës të dokumenteve të Kongresit të Jashtëzakonshëm të PDK, mbajtur më 6 maj 2008, i cili zgjodhi si kryetar të kësaj partie Anton Gurakuqin, ky i fundit ka deklaruar se ky është fundi i mashtrimeve të Nard Ndokës.
“Pranimi nga ana e gjykatës së Tiranës, i dokumenteve të Kongresit të Jashtëzakonshëm të datës 6 maj 2008 dhe depozitimi i tyre në dosjen e PDK, i jep fund spekulimeve dhe mashtrimeve që Nard Ndoka po i bën opinionit publik, si dhe anëtarësisë së PDK”, - tha Gurakuqi.
Ai deklaroi se konflikti po shkon drejt zgjidhjes nga pikëpamja ligjore dhe se tashmë në Kuvend pritet të ketë një grup të vërtetë demokristian.
“PDK përfundon kështu problemet konfliktuale brenda saj, kjo kryesi i bën thirrje ish-kryetarit, Nard Ndoka, të pranojë humbjen dhe të ndërpresë fushatën dezinformuese dhe denigruese ndaj drejtuesve të PDK. Ndërkohë, deputetëve Nikollë Lesi, Pashk Ujka e Tom Doshi, të cilët mbështesin PDK, do t’i bashkohen edhe deputetët e tjerë për të formuar një grup të vërtetë demokristian”, - tha kryetari i PDK.
Ai tha se kryesia e PDKvlerëson qëndrimin e mbajtur nga kryetarët e saj të komunave Kelmend, Dajç e Lekbibaj. Duke shprehur sigurinë se atyre do t’i bashkohen edhe kryetarët e tjerë të komunave demokristiane, kryesia e PDK iu bën thirrje të gjithë kryetarëve dhe drejtuesve të saj lokalë nëpër rrethe të vazhdojnë të qetë aktivitetin e tyre dhe të sqarojnë opinionin për atë çfarë ka ndodhur në PDK.
Burime nga zyra e shtypit e PDK bënë të ditur se në gjykatën e Tiranës, në seancën e djeshme gjyqësore, nën drejtimin e gjyqtarit Artur Gaxhi, u depozitua dokumentacioni i Kongresit të Jashtëzakonshëm të kësaj partie, mbajtur më datën 6 maj ‘08, i cili zgjodhi kryetar të PDK, z. Anton Gurakuqi, si dhe të gjithë dokumentacionin tjetër shoqërues, konform statutit të PDK, i përbërë nga firmat e 74 anëtarëve të Këshillit Kombëtar të PDK, 12 anëtarëve të kryesisë së PDK, si dhe të 1/3 së delegatëve të Kongresit të datës 11 dhjetor 2004 të PDK.