Ish-kryepolici Prençi u eliminua nga Nishani

Lindita Çela

Prokuroria i jep të drejtë ish Drejtuesit të Parë të policisë Shemsi Prençit për hetimet ndaj mafies së kromit në Bulqizë. Pas një hetimi të drejtuar nga krerët e Prokurorisë së Përgjithshme vlerësohen legjitime masat e ndërmarra nga ish drejtuesi i policisë së Qarkut të Dibrës për parandalimin e korrupsionit dhe veprimtarisë kriminale në minierën e Bulqizës. Hetimi që mban firmën e drejtorit të Drejtorisë së Kontrollit të Hetimeve dhe Ndjekjes Penale, z. Sokol Stojani, thuhet se plani i masave të ndërmarra nga ish drejtori Prençi si dhe sekuestrimet e bëra të kromit janë ligjshme. Me përfundimin e hetimeve janë njohur të gjitha strukturat vartëse të prokurorisë së Përgjithshme. Po kështu, pritet që prokurorë nga Tirana të ndjekin hetimet për të ashtuquajturën mafia e kromit në Bulqizë

Sekuestroja e kamionëve me krom

Dokumenti që legjitimon masat e ndërmarra për parandalimin e krimit ekonomik dhe të veprimtarive mafioze në minierën e kromit mban datën 1 qershor i vitit 2012. Në katër faqet e tij argumentohen ngjarjet e ndodhura në mesin e prillit të këtij viti në minierën e Bulqizës si dhe procedurat juridike të ndjekura në hetimin dhe zbulimin e asaj që sot quhet skandali i kromit. Më 16 prill, në kuadër të një operacioni të policisë lokale të Bulqizës janë sekuestruar disa kamionë të ngarkuar me krom në vendin e quajtur “Zona e Parë”, në Bulqizë. Sipas policisë, dokumentet shoqëruese të mallit ishin të falsifikuara. Kamionët ishin ngarkuar me dyfishin e sasisë së deklaruar me krom si dhe dokumentet shoqëruese nuk ishin reale. Në këto kushte është bërë sekuestrimi i kamionëve dhe nisja e hetimeve për ngjarjen. Dy ditë më vonë, prokurori i Rrethit të Dibrës, Hysni Vata, urdhëron zhbllokimin e kromit me argumentimin se vendimi për sekuestrim ishte i paligjshëm. Pikërisht ky vendim ka qenë objekt i hetimit të Prokurorisë së Përgjithshme. Pas lëshimit të urdhrit nga prokurori i Rrethit, Hysni Vata, Policia e Shtetit vendosi pezullimin e më pas shkarkimin nga detyra të Drejtuesit të I Shemsi Premçi. Akuza që rëndonte mbi Prençin ishte shpërdorimi i detyrës, ndërkohë që ai pretendonte se ishte shkarkuar nga mafia e kromit. Fakt është që prej vitesh Policia e Shtetit nuk ka marrë asnjë masë ndaj veprimtarive të jashtëligjshme që zhvillohen në minierën e Bulqizës.

Hetimi

“Nga studimi i materialeve konkrete bëhet fjalë për një plan masash të marra nga drejtoria e Policë së Dibrës dhe verifikimi i mjeteve ka qenë si pasojë e një kontrolli rutinë. Veprimet e kryera nga policia gjyqësore janë në përputhje me ligjin në kushtet e flagrancës. Po kështu, në sa ka ndodhur, ka element të veprës penale, e ky fakt duhet të ishte marrë në konsideratë. Për këtë arsye vendosa shfuqizimin e vendimit të vleftësimit të sekuestros datë.18.04.2012 të Prokurorisë së rrethit Gjyqësor, Dibër, duke urdhëruar vleftësimin si të ligjshëm të sendeve dhe dokumenteve të sekuestruara”- thuhet në raportin e hartuar nga prokurori Sokol Stojani.

Ethet e kromit, 106 licenca vetëm për Bulqizën

Zyrtarisht, vetëm në zonën e Bulqizës janë të licencuara që nga viti 1999 e deri mars të 2011-të. 106 kompani, por ndër më të rëndësishmet është koncesionarja “ACR”. Kjo kompani ka numrin më të madh të punëtorëve si dhe posedon zonën më të “majme” të kromit, të ashtuquajturën zonën “D”. Por, megjithëse Ministria e Ekonomisë Tregtisë dhe Energjetikës ka dhënë licenca për shfrytëzimin e kromit, ajo kurrë nuk ka bërë të qartë kufijtë ndarës nën galeritë e minierës. Që këtu nis abuzimi që për vendasit shndërrohet në “tokën e zanun”, ku nuk janë të pakta rastet e ekzekutimit të atyre që kanë guxuar të vënë duar në kromin e zaptuar. Punëtorët nxjerrin nga nëntoka krom për një pagesë qesharake. “Të fortët” e grumbullojnë e më pas me një çmim shumë të ulët ua shesin kromin kompanive të licencuara, më pas transportohet në Durrës si një mall i pastër ligjërisht. Kjo është gjithë skema e abuzimit dhe e përfitimit të kromit të Bulqizës. Së paku, këtë ka vënë në dukje raporti i oficerëve të sektorit kundër krimit ekonomik në Policinë e Shtetit. Mekanizmi duket se është i qartë për këdo që merret me këtë biznes. Por duket se këtë mekanizëm të shfrytëzimit të krahut të lirë të punës, shmangies së taksave dhe mbrojtjes nga të “fortët”, që në të shumtën e rasteve janë njerëz me precedentë penal, nuk e bën çdo kompani e licencuar. Të paprekshmit që bëjnë këto abuzime, jo vetëm financiare, janë shoqëri që kanë lidhje me oficerë policie, efektivë të Gardës së Republikës e deri tek drejtuesit e Ministrisë së Ekonomisë.

Ç’do të ndodhë?

1- Ministri i Brendshëm, Bujar Nishani, Drejtori i Përgjithshëm i Policisë, Hysni Burgaj dhe disa vartës të tij mund të përfshihen në hetimin e aferës së kromit, sipas akuzave të bëra nga ish Drejtuesi I i Policisë, Prençi

2- Vendimi i Prokurorisë së Përgjithshme i hap rrugë fitores së Prençit në gjithë proceset gjyqësore. Largimi i tij u pa si fitore e mafies së kromit ndaj Policisë së Shtetit.

3- Prokuroria e Dibrës rihap çështjen e mbyllur të kromit pas shkarkimit të Drejtuesit I të Policisë, Prençi

Burgaj: Prençi abuzoi me detyrën

Pas akuzave që Drejtuesi i Parë Shemsi Premçi bëri për përfshirjen e strukturave të Ministrisë së Brendshme në atë që ai e quan, mafia e kromit, Policia e Shtetit deklaroi përjashtimin e tij nga radhët e uniformave blu. “Kanë ardhur ankesa nga subjekte private të licencuara në shfrytëzimin e mineralit të kromit për veprime në tejkalim të kompetencave dhe shantazhuese për shkak të konkurrencës tregtare, nga ana e drejtorit të policisë Shemsi Prençi. Pas këtyre masave paraprake të marra në interes të hetimit administrativ, Drejtues i Parë Shemsi Prenci adreson publikisht fyerje dhe ofendime të rënda përpara mediave në adresë të drejtuesve të Këshillit të Ministrave, të Ministrisë së Brendshme dhe të Policisë së Shtetit, në shkelje të rëndë të Ligjit për Policinë e Shtetit . Ndërkohë që në përfundim të hetimit administrativ, me propozim të Drejtorisë së Standardeve Profesionale, Drejtori i Përgjithshëm i Policisë së Shtetit vendosi “Përjashtimin nga Policia” të Drejtues i Parë Shemsi Prençi për “Kryerjen e veprimeve të pahijshme” si dhe “Shkelje ose mosushtrimi i kompetencave të Policisë”-thuhet në njoftimin zyrtarë të Drejtorisë së Përgjithshme të Policisë së Shtetit.

Nishani: “Prençi t’i drejtohet prokurorisë”

“Kush ka pretendime mbi hetimet e policisë t’i drejtohet prokurorisë apo dhe gjykatës”. Kështu deklaroi disa ditë më parë, Ministri i Brendshëm, Bujar Nishani. I gjendur në komisioni parlamentar të Integrimit, Bujar Nishani, është vënë në qendër të akuzave të opozitës për aferat e kromit në Bulqizë. Deputetët e opozitës kanë kërkuar shpjegime për akuzat e lëshuara nga Prençi si dhe skandalin e komisariatit të Burrelit ku gjykata dënoi Policinë e Shtetit me 1 milion euro. “Nëse nga hetimi i policisë së shtetit cenohen interesat e kujtdo, kjo nuk duhet të na prekë asnjërin prej nesh. Për sa kohë dikujt i cenohen interesat gjatë një hetimi të policisë, natyrisht, policia nuk ndalet e nuk sprapset. Çdo pretendim mbi veprime abuzive të policisë drejtohet në prokurori dhe gjykata”, deklaroi Nishani.

Prençi: “U përballa i vetëm me mafien e kromit”.

Nuk ka asnjë dijeni për vendimin e Prokurorisë së Përgjithshme, edhe pse është ndër personat e hetuar. “Tani, që po ma thoni ju ketë vendim, më shqetëson fakti i prokurorit të Dibrës, i cili për arsye që vetëm ai i di, është vënë nën shërbim të mafies së kromit duke shkelur ligjin dhe duke luftuar policinë”- tha dje gazetën Shemsi Prençi. Vendimin e prokurorisë e konsideron si një fitore që ai e arriti i vetëm në luftën kundër mafies së kromit në Bulqizë. “Që në momentet e para të marrjes së detyrës strukturave të luftës kundër krimit iu kam kërkuar që të bëjnë një informacion të plotë rreth veprimtarisë kriminale që kanë lidhje drejtpërdrejtë me aferat korruptive të kromit në Bulqizë dhe Mat. Informacionin e kam nisur shumë të detajuar për prezencën e strukturave e prore të Policisë së Shtetit. Ka disa të vrarë, të zhdukur, përplasje me armë në mes të qytetit e në bazë të këtyre informacioneve unë kam krijuar një vizion të qartë mbi veprimtarinë kriminale dhe jam munduar të krijoj strategjinë e luftës kundër këtij kriminaliteti. Kemi hartuar plan masash, i cili është miratuar nga të gjitha strukturat, madje dhe nga drejtori i përgjithshëm, Burgaj. Pikërisht ky plan masash është quajtur si legjitim nga Prokuroria ndaj ndihem mirë.”-tha dje Shemsi Premçi. Sipas tij, ky vendim e bën të ketë shpresë tek drejtësia. “Pas këtij vendimi duhet të hetohet dhe favorizim i hapur i ministrit Nishani për biznesmenin me të cilin ka lidhje te vjetra si oficer qysh në Shkollë të Bashkuar”, thotë Prençi.

Ish-kryepolici Prençi u eliminua nga Nishani

Ish-kryepolici Prençi u eliminua nga Nishani

Ish-kryepolici Prençi u eliminua nga Nishani :: Komentet