Rusia ka bërë surprizën e radhës në EURO 2008, duke eliminuar Holandën, pas fitores në kohën shtesë me rezultatin 3-1. Rusët e drejtuar nga Hidink kanë dominuar në këtë sfidë, duke krijuar më shumë raste dhe duke eliminuar pretendentet kryesore të aktivitetit, për të zënë një vend në gjysmëfinalet e turneut.

Që në fillimin e ndeshjes, Hidink tregon edhe një herë se është një mjeshtër për të përgatitur ndeshje kundër skuadrave të mëdha, duke arritur të bllokojë manovrën ofensive të holandezëve. Për më tepër, janë rusët që shfaqen më agresivë në lojën e tyre, duke rrezikuar me Zirianov, Kolodin dhe Pavliushenkon, ku sidomos ky i fundit gabon në mënyrë të pafalshme para portës së Van Der Sar me një gjuajtje me kokë. Holanda provon të dalë nga gjysmëfusha e saj dhe fillon të vizitojë portën e Akinfev, sidomos falë goditjeve standarde të ekzekutuara nga Van Der Vart. Por rusët nuk kthehen në mbrojtje dhe arrijnë të vënë disa herë në vështirësi portierin Van Der Sar, i cili detyrohet të bëjë dy herë radhazi mrekullinë, fillimisht ndaj gjuajtjes brenda zonës së Arshavin, e më pas ndaj predhës së Kolodin nga distanca. Më pas janë holandezët që ringjallen dhe Van Nistelroi ka mundësi të artë për të shënuar pas një goditjeje dënimi të Van Der Vart, por sulmuesi nuk arrin të devijojë topin në rrjetë. Më pas janë Shnajder dhe Van Der Vart që provojnë me goditjet standarde, por Akinfev është i pakalueshëm. Si rrjedhojë, pjesa e parë mbyllet në barazimin pa gola 0-0.

Me rikthimin në fushë të dy skuadrave, Van Basten mundohet të ndryshojë diçka, duke larguar Kuijt dhe Bulahruz, për t‘i bërë vend Van Persit dhe Heitingës. Por loja e holandezëve nuk ndryshon dhe janë rusët që kontrollojnë qetësisht gjithçka, duke u shfaqur më konkretë në aksionet e tyre. Në minutën e 56-të vjen edhe e papritura, ku Rusia gjen golin e avantazhit me një aksion spektakolar të nisur në krahun e majtë. Arshavin kombinon me Semak, ndërsa ky i fundit pason në qendër për Pavliushenkon i cili e dërgon topin në rrjetë duke shtangur Van Der Sar. Van Basten preferon të mos presë më për ndryshimin e tretë, duke futur menjëherë në fushë Afellain në vend të Engelar, për të ndërtuar një formacion tërësisht ofensiv. Por tashmë, Hidink udhëzon skuadrën e tij të jetë më e kujdesshme në prapavijë dhe të rrezikojë vetëm me kundërsulme. Në minutën e 70-të, është Zhirkov që rrezikon portën e Van Der Sar me një gjuajtje diagonale, por gardiani i holandezëve arrin të devijojë. Vetëm një minutë më pas është Arshavin që depërton në krahun e majtë, por pasimi i tij në qendër nuk arrin të devijohet nga Aniukov në portën e boshatisur. Holandezët tashmë janë në kaos dhe nuk arrijnë të ndërtojnë aksione të mirëfillta para portës ruse, duke u kufizuar vetëm me gjuajtjet nga jashtë zonës. Por Shnajder dhe Van Der Vart nuk duken në një ditë të mirë dhe Akinfev vetëm sheh se si topi përfundon jashtë kuadratit të tij në çdo tentativë të tyre. Për të zgjidhur problemet e Van Basten mendon i zakonshmi Rud Van Nistelroi, i cili në minutën e 86-të devijon saktësisht në portë një goditje dënimi të Shnajder, duke barazuar rezultatin. Rusët nuk arrijnë të reagojnë dhe koha e rregullt mbyllet në barazim 1-1, duke dekretuar shtesat. Në shtesën e parë, është përsëri Rusia që ka rastet më të mira për të shënuar, me Pavliushenkon që godet traversën, si dhe me Torbinskin që nuk arrin të mposhtë Van Der Sar. Epërsia e holandezëve konkretizohet në pjesën e dytë shtesë, më saktësisht në minutën e 112-të me anë të Torbinskit, i cili dërgon topin në rrjetë pas një pasimi të Arshavin. Më pas është edhe fantazisti i Zenitit që ka shansin të tregojë vlerat e tij duke shënuar golin e tretë në minutën e 116-të, duke kaluar topin mes këmbëve të Van Der Sar. Më vërshëllimën përfundimtare, rusët fillojnë festën, ndërsa "tulipanët" largohen me kokën ulur nga aktiviteti ku cilësoheshin si favoritët kryesorë.
Shqip