Qeveria rrit me 80% pagat krahasuar me 2005, harrohen çmimet, sot 50% më të larta
Nga Fitim Zekthi

Qeveria shqiptare rritjen e pagave e ka shoqëruar edhe me disa krahasime të bëra me pagat e para tre viteve, duke dëshmuar kështu, sipas saj, edhe domethënien e këtyre pagave të reja. Kështu, duke huazuar një taktikë të vjetër krahasimesh, duke përzgjedhur atë që do dhe duke lënë mënjanë tregues të tjerë, me të cilët janë të lidhur pagat, arrihet në përfundimin se mesatarisht kemi një rritje pagash që shkon deri në 80 për qind krahasuar me tre vite më parë. Në të vërtetë, veç pagave që në vlerë monetare kanë pësuar këtë rritje, kanë ndryshuar në krahasim me vitin 2005 edhe çmimet e konsumit, të cilat janë rritur vetëm në 4 muajt e parë të këtij viti me rreth 20 për qind. Duhet të përmenden këtu çmimet e ushqimeve me bazë drithërat dhe çmimet e karburantit. Fuqia blerëse ose pushteti i blerjeve në bazë të llogarive ka rënë më së paku 17 për qind. Inflacioni për herë të parë pas mjaft kohësh nisi në fundin e vitit të kaluar të rritej dhe arriti në muajin prill në 4,6 për qind nga rreth 2,5 për qind që ishte, domethënë ai i u dyfishua. Çmimet e karburanteve janë rritur me 50 për qind në pak muaj dhe kjo ka bërë që veç tyre të rriten edhe kostot e shumë shërbimeve dhe produkteve të tjera. Këto janë disa prej elementeve që duhet të merren parasysh, kur bëhen këto krahasime. Sipas llogarive të bëra, pagat e reja në arsim dhe në shëndetësi dhe në zëra të tjerë të punonjësve buxhetorë nuk janë rritur më shumë sesa 25 për qind. Pagat që janë sot me vendimet e reja të qeverisë janë 80 për qind në krahasim me vitin 2005, në rast se sot do të kishim të njëjtit tregues si në vitin 2005. Veç çmimeve këtu duhet llogaritur edhe një numër i madh treguesish që nisin që nga niveli i konsumit, niveli shitjeve, indeksi i çmimeve të konsumit, të prodhimit etj. Krahasimet me vite të shkuara sjellin në vëmendje krahasime të kritikuara ashpër dhe me të drejtë që i bënte administrata e socialistëve dikur, kur iu referohej të dhënave në vitin 1997 dhe fliste për ato të vitit 2005. Më herët këtë taktikë e përdorte qeveria komuniste e diktaturës, kur gjithmonë gjithçka e krahasonte me vitin 1938.




Pagat e mjekëve rriten 15%, të mësuesve 14%


Të gjithë punonjësit e sistemit arsimor parauniversitar do të marrin paga 14 për qind më të larta që prej 1 korrikut të këtij viti. Qeveria shqiptare njoftoi dje se, ajo kishte vendosur që paga e arsimtarit të shkollës së nëntëvjeçare të bëhet 41 847 lekë që prej kësaj date, duke qenë rreth 6 mijë lekë me e lartë sesa më parë. Pagat e mësuesve të shkollave të mesme do të bëhen 45 055 lekë, duke u rritur edhe ato me rreth 14 për qind. Kryeministri, Sali Berisha, tha dje gjatë njoftimit për pagat e reja në mbledhjen e qeverisë se, ajo po mban premtimet e dhëna dhe se deri vitin që vjen ajo do t’i ketë dyfishuar pagat në krahasim me vitin 2005. Kryeministri tha se paga mesatare për të gjithë punonjësit buxhetorë në vend është rritur nga 27 336 lekë në vitin 2005 në 42 439 lekë në muaj në vitin 2008, një rritje prej 55 për qind. Kjo është rritja e pagës mesatare të administratës publike në tërësi, por kjo rritje pagash krahasuar me vitin 2005 nuk merr parasysh nivelin e inflacionit dhe të indeksit të çmimeve të konsumit. Në rritjen e pagave të miratuar nga qeveria kanë përfituar të gjithë punonjësit buxhetorë, por ata me pagat më të larta dhe ata me pagat më të ulëta janë ata që do të përfitojnë më pak. Kësisoj, punonjësit me paga të ulëta do të kenë një pagë shtesë prej 7 përqindësh në disa kategori dhe deri në 15 për qind për kategori të tjera. E njëjta vlerë e re page shtesë do të jetë edhe për punonjësit me pagat të larta, të cilët do të përfitojnë një rritje prej 74%. Të gjithë punonjësit e ministrive dhe punonjësit e Kryeministrisë do të kenë një pagë shtesë prej 7 %. Kategoria e punonjësve që do të përfitojnë më shumë rritje page do të jenë punonjësit e sistemit shëndetësor. Dymbëdhjetë mijë infermierë dhe 4700 mjekë do të përfitojë një pagë të re 15 për qind më të lartë sesa ajo e deritashmja. Pagat e infermierëve të spitaleve të qendrave universitare do të jenë që pas 1 korrikut të këtij viti 29 061 ose 15 për qind më të mëdha, duke u rritur me rreth 37 mijë lekë të vjetra. Pagat e infermierëve të qendrave shëndetësore në rrethe do të jenë 26 534, duke u rritur me rreth 3500 lekë. Të gjithë infermierët e qendrave spitalore në rreth do të marrin një pagë të re prej 24 300 lekësh që prej 1 korrikut. Mjekët në qendrat spitalore universitare do të marrin një pagë prej 39 700 lekësh, duke përfituar kështu 15 për qind më shumë sesa para 1 korrikut. Edhe mjekët e sistemit të qendrave shëndetësore të rretheve do të kenë paga 15 për qind më të larta dhe do të marrin saktësisht 39 700 lekë. Mjekët e qendrave spitalore në rrethe do të marrin një pagë prej 37 000 lekësh. Qeveria ka rritur edhe pagat e punonjësve të doganave dhe të tatimeve me rreth 7 për qind.




Krahasimet e pagave të reja me ato të vitit 2005


Qeveria shqiptare dje në mbledhjen e saj u kujdes që të shoqëronte njoftimin për rritjen e pagave me rreth 15 për qind për punonjësit buxhetorë, duke bërë krahasimet me vitin 2005. Kësisoj, sipas këtyre të dhënave, paga mesatare për të gjithë punonjësit buxhetorë në vend është rritur nga 27 336 lekë në vitin 2005 në 42 439 lekë në muaj në vitin 2008, një rritje prej 55 për qind. Kjo është rritja e pagës mesatare të administratës publike në tërësi. Paga mesatare për punonjësit e institucioneve në varësi të ministrive apo institucioneve të tjera, për 46 939 punonjës, është rritur nga 31 275 lekë në muaj në vitin 2005, në 45000 lekë në vitin 2008, apo 50 për qind më e lartë në vitin 2008, krahasuar me vitin 2005. Paga mesatare për punonjësit e arsimit parauniversitar, për 36 288 arsimtarë, është rritur nga 23100 lekë në muaj në vitin 2005, në 45300 lekë në vitin 2008, ose rreth 75 për qind më e lartë në vitin 2008, krahasuar me vitin 2005. Paga mujore e arsimtarit me shkollë të mesme është rritur nga 20068 lekë në muaj në vitin 2005, në 35013 lekë në muaj në vitin 2008, me një rritje prej 75 për qind. Paga mujore e arsimtarit të shkollës tetëvjeçare është rritur nga 23665 lekë në vitin 2005, në 41847 në vitin 2008, ose një rritje prej 77 për qind. Paga mujore e arsimtarit të shkollës së mesme është rritur nga 26240 lekë në vitin 2005 në 45055 lekë në vitin 2008, ose një rritje prej 72 për qind. Paga mujore për infermierët është rritur nga 15044 lekë në muaj në vitin 2005, në 28564 lekë në vitin 2008, ose 89 për qind më e lartë se në vitin 2005. Paga mujore e infermierit në qendrat spitalore universitare është rritur nga 16150 lekë në vitin 2005, në 29061 lekë në vitin 2008, një rritje prej 80 për qind, krahasuar me vitin 2005. Paga mujore për infermierët në qendrat e shëndetit publik është rritur nga 14500 lekë, në 26534 lekë në vitin 2008, me një rritje prej 83 për qind. Paga mujore e infermierit në qendrat spitalore në rrethe është rritur nga 13500 lekë në vitin 2005 në 24300 lekë në vitin 2008, me një rritje prej 80 për qind. Paga mesatare për rreth 3 mijë mjekë, është rritur nga 22683 lekë në muaj në vitin 2005, në 41700 lekë në muaj, ose rreth 84 për qind më e lartë se në vitin 2005.
Tema