Pragzgjedhjet, Berisha rrit edhe pagat

Pas legalizimit të 200 mijë ndërtimeve, Kryeministri premton rroga e pensione më të larta: Nga 1 maji 2009


Qeveria premton rritje rrogash dhe pensionesh, një muaj përpara mbajtjes së zgjedhjeve të përgjithshme parlamentare të vitit 2009-të. Kreu i qeverisë, Sali Berisha, premton se gjatë vitit elektoral do të ketë një rritje të pensioneve dhe rrogave.

"Në kuadër të fushatës elektorale, do të rrisim rrogat dhe pensionet më 1 maj të vitit të ardhshëm. Pensionet do të kenë një rritje prej 10 për qind në qytet dhe 20 për qind në fshat", premtoi Kryeministri. Shefi i qeverisë bëri publike shifrat e buxhetit të vitit të ardhshëm. "Për vitin 2009, do të jenë në buxhetin e shtetit 5.2 miliardë dollarë, rreth 1 miliard më shumë se një vit më parë", u shpreh Berisha. Sipas Kryeministrit, 1 miliard lekë do të përdoren për të dyfishuar rrogat e arsimtarëve dhe mjekëve dhe për të rritur pensionet e fshatit në masën 20% dhe të qytetit me 10%. Deklaratën Kryeministri e dha në mbledhjen e Komitetit të Strategjive, ku vlerësoi edhe punën e të gjithë ministrave që kanë bërë në këto muaj. Në këtë mbledhje, Kryeministri Berisha tha se, bazuar në rritjen e këtij buxheti, në 1 maj 2009, qeveria do të bëjë rritjen e re të pensioneve dhe pagave përreth 800 mijë familje shqiptare. Premtimi i qeverisë deri në fundin e mandatit të parë është që të dyfishojë pagat e mësuesve, të infermierëve e mjekëve. Duke u munduar që të përjashtojë mendimet, pasi rritja e pagave dhe pensioneve po bëhet si pjesë e premtimeve të qeverisë "Berisha" dhe jo se po përdoret për fushatën e ardhshme elektorale, Berisha shprehet se "nuk do ta bëjmë rritjen në qershor, pasi atëherë janë zgjedhjet dhe kjo nismë do të shfrytëzohej për kritika ndaj qeverisë". Kryeministri tha se buxheti prej 5.2 miliardë dollarësh rritet me dyfishin, krahasuar me buxhetin e fundit të qeverisë socialiste, ndërsa krahasuar me këtë qeveri, me muajin shtator 2007, ai do të jetë 1 miliard dollarë më shumë. "Rritja e buxhetit, mbështet fuqishëm investimet në të katër anët e vendit, në ujësjellës-kanalizime, impiante të përpunimit të ujërave, në rrugë dytësore, në investimet në akset kombëtare", tha ai. Shefi i Ekzekutivit vlerësoi punën e ministrive që kanë arritur të hartojnë në kohë buxhetin 2009, duke i krijuar mundësinë qeverisë që të paraqesë atë në parlament brenda muajit shtator. Ndërsa buxhetit i vitit 2008 ishte 4.2 miliardë dollarë, buxheti i vitit 2009 është 5.2 miliardë dollarë. "Fakti që këtë vit në buxhet do të jenë 1 miliard dollarë më shumë se vitin që kaloi, përbën një lajm shumë të mirë. Kjo do të thotë qindra e qindra kilometra rrugë më shumë për shqiptarët, dhjetëra shkolla të tjera të reja, mbështetje e fuqishme e rritjes ekonomike", tha Berisha. Buxheti është paraqitur në kohën e kërkuar nga ministritë. Për këtë Kryeministri premtoi të çojë në Kuvend brenda muajit shtator një buxhet prej 5.2 miliardë dollarësh. "Janë 800 mijë familje shqiptare, të cilave ky buxhet u ndryshon ndjeshëm mirëqenien", u shpreh Berisha. Sipas tij, rroga mesatare në këtë vend është nga më të lartat aktualisht. "Në sektorin publik ajo ka arritur shumën 502 dollarë, ose 427 mijë lekë. Ftoj edhe sektorin privat, i cili edhe ai ka bërë progres në rritjen e rrogave, që ta vazhdojë këtë rrugë. Në rast se sipas statistikave të ILO-s, Organizatës Ndërkombëtare të Punës, që bën të ditur se rroga mesatare ka qenë 220 dollarë, tashmë këtë rrogë për punonjësit në Shqipëri e kemi mbi dyfishuar, duke e çuar në 502. Kjo është një rrogë mesatare e pranueshme për një vend me një trashëgimi si Shqipëria", theksoi Berisha.
Shqip