as qe pres nga asnje i majte apo i djathte,nga asnje "patriot" spres kete gje,kane kaluar 18/19 vjet nga rrezimi i diktatures dhe asnje zbardhje nuk eshte bere per te zbuluar se cu be ato 45 vjet,vetem grimca dalin.pusht-etaret tane jane vetem ti lepijne kembet grekut qe mos rezohen nga kareklla e tyre qeveritare.

Do ta zbardhe Kurt Kola.

Pikes i ke rene Mira.

Siç duket, edhe zhurma për hapjen e dosjeve në Shqipëri do të degjenerojë në një hiç. Ky është paralajmërimi i një prej ish-drejtuesve të lartë të Shërbimit Sekret Shqiptar. Ai ka pranuar të rrëfejë për "Shqip" natyrën e dosjeve që priten të hapen. Për shkak të detyrës që ka kryer pak vite më parë, por edhe etikës, ai ka kërkuar të flasë i paidentifikuar.

Dosjet

Sipas tij, dosjet që aktualisht posedon Shërbimi Informativ Shtetëror (SHISH) janë qesharake. "Vetë politika dhe njerëzit që e bëjnë atë e kanë të qartë, madje shumë të qartë, se në SHISH ndodhen dosjet më qesharake", thotë ish-drejtuesi i lartë i Sigurimit të dikurshëm të Shtetit. Dhe si për ironi, disa nga ish-deputetët, por dhe deputetët aktualë e disa zyrtarë të tjerë e kanë paralajmëruar diçka të tillë. Sipas tyre, dosjet po përdoren thjesht si shantazh, ose për përfitime elektorale në prag të zgjedhjeve të përgjithshme. Nuk përjashtohet, sikurse në gjithë këto vite të pasdemokracisë, edhe përdorimi i tyre për "larje hesapesh mes rivalësh politikë".

Batutat

"Rrimë gjithë këto orë për një shishe të qelbur qumësht"; "Domatet që blejmë ne janë të kalbura. Të mirat i çojnë jashtë"; "Sa bukë e zezë. Duket se ka shumë pak miell"; "Po na gënjejnë me pasqyrat në markete. I vënë që të duket sa më shumë mall". Këto e shumë "batuta" të tjera të thëna në radhët e shumta që shqiptarët mbanin ende pa gdhirë, sot ndoshta ngjajnë si barsoleta, por dikur ishin më se të vërteta. Pikërisht, këto shprehje ndodhen të gjitha të arkivuara në dosjet "top secret" në SHISH. "Kurdoherë që të hapen ato, sot, nesër apo edhe në të ardhmen e largët a të afërt, ato do të jenë dosjet më qesharake. Duke e ditur këtë, politika shqiptare është duke kërkuar me ngulm hapjen e këtyre dosjeve që nuk thonë asgjë", thotë ish-zyrtari.

Fondi 14

"Nëse ka dosje, brenda të cilave ka të dhëna serioze mbi ish-spiunët, janë pikërisht ato që i përkasin sektorit special të ish-Komitetit Qendror të Partisë së Punës së Shqipërisë", shprehet një nga ish-drejtuesit e lartë të Sigurimit të Shtetit. Sipas tij, në to ndodhen "vërtet gjëra serioze", që "pa frikë mund të shkaktojnë tërmet në politikën aktuale shqiptare". Duket se bëhet fjalë për "informatorë të zellshëm politikë" dhe jo për "kooperativistë të rëndomtë. Kategoria e parë është ajo që ende po drejton politikën shqiptare, ndërsa e dyta ndoshta nuk e di se ka dosje për ta. Ky fond njihet si fondi nr. 14 dhe, sipas të dhënave jozyrtare, ka një kohë maturimi prej 150 vjetësh. Dhe po sipas këtyre të dhënave, do të jetë shumë e vështirë hapja dhe publikimi i tyre, qoftë edhe me ligj nga Kuvendi i Shqipërisë, për shkak të kufizimeve të vendosura nga disa konventa ndërkombëtare, të firmosura edhe nga autoritetet zyrtare shqiptare.



Deputeti i PD-së komenton debatin rreth dosjeve të Sigurimit të Shtetit


Leskaj: Sigurimsa në

qeveri? Të ikin me turp


"Nëse ka bashkëpunëtorë të ish-Sigurimit në qeveri, duhet të largohen dhe madje me turp". Kjo ishte deklarata e bërë publike dje nga deputeti i Partisë Demokratike, Bujar Leskaj. Një prej zërave më kritikë brenda partisë kryesore në pushtet komentoi debatin e fundit për çështjet e dosjeve të Sigurimit të Shtetit. Sakaq, pritet që këtë javë, në komisionet e Kuvendit të shqyrtohen projektligjet e paraqitura.

Deklarata

Deputeti Leskaj vlerëson se pasi ky ligj të kalojë në Parlament, është detyrim ligjor, por edhe detyrim moral i kujtdo drejtuesi, që nëse ka pasur për individë të caktuar dijeni, kuptohet nuk kishte pse t‘i punësonte. "Në drejtësi, institucione të tjera të administratës publike të shtetit, largimi dhe vetëm pastrimi i administratës nga këta individë e ndihmën atë, forcon policinë, gjyqësorin etj.", konstatoi Leskaj. Ndërsa shtoi se për fatin e tyre të keq, që në momentin që këta persona kanë bashkëpunuar me Sigurimin e Shtetit në mënyrë vullnetare, apo në mënyrë të detyruar ata janë lehtësisht të shantazhuar. "Janë persona të cilët në politikë nuk ndreqin punë, janë persona që në momente kyçe të politikës, ose zhvillimeve mes partive, apo brenda partive janë lehtësisht të atakueshëm", nënvizoi Leskaj. Në vlerësimin e tij, hapja e dosjeve është kusht i nevojshëm, por jo kusht i mjaftueshëm për dekomunistizimin e shoqërisë shqiptare. Të gjithë këta, sqaron Leskaj, kushdo qofshin, nuk e meritojnë të jenë në politikën shqiptare dhe në këtë drejtim ne nuk duhet të kemi asnjë sentiment. "Këtu nuk është problemi as për të marrë ndonjëri flamurin e kësaj lufte, këto më shumë do thosha janë parime që duhet të funksionojnë në shoqëritë e vendeve ish-komuniste", u shpreh Leskaj.

Diskutimi

Këtë javë pritet që komisionet përkatëse në Parlament të marrin përsipër të diskutojnë rreth projektligjeve të paraqitura për hapjen e dosjeve. Relatorët në Komisionin e Ligjeve janë nga Partia Demokratike, deputeti Aldo Bumçi dhe nga Partia Socialiste deputeti Arben Isaraj. Të dy relatorët do të paraqesin për diskutim në Komisionin e Ligjeve propozimin e tyre. Para pak ditësh, Kryetarja e Kuvendit, Topalli, nëpërmjet një shkrese theksonte se prej dy vitesh janë dërguar për shqyrtim në komision projektligjet për pastërtinë e figurave të zyrtarëve të lartë të administratës dhe të të zgjedhurve të propozuar nga tre partitë politike, PD-ja, PS-ja dhe PDK-ja. Topalli ka kërkuar që këto projektligje të shqyrtohen nga Komisioni i Ligjeve me përparësi, për të bërë të mundur kalimin e tyre sa më shpejtë në seancë plenare. Por, nisma e Kryetares së Kuvendit nuk është vlerësuar si një gjetje nga politika dhe nga drejtues të ndryshëm të partive politike. Sipas tyre, kjo bëhet për një qëllim të caktuar, pikërisht para zgjedhjeve të përgjithshme dhe në një kohë kur vendi është përfshirë në situata mjaft të pakëndshme dhe skandale të shumta të shkaktuara nga vetë qeveritarët.



Biberaj: Pse duhen hapur dosjet


Veç tri projektligjeve të paraqitura tashmë nga Partia Demokratike, Partia Socialiste dhe ajo Demokristiane mbi hapjen e dosjeve të ish-bashkëpunëtorëve të Sigurimit të Shtetit, Komisionit të Ligjeve i është dorëzuar zyrtarisht dhe një i katërt, një kombinim i tyre (PD-PS-PDK), por me disa elemente shtesë, bazuar kjo edhe mbi thithjen e informacioneve nga vendet anëtare të NATO-s dhe Bashkimit Evropian.

Projektligji në fjalë u paraqit në mesjavën e shkuar në Komisionin e Ligjeve nga deputeti demokrat Aleksandër Biberaj, njëkohësisht zv/president i Asamblesë Parlamentare të Këshillit të Evropës. "Pasi kam studiuar dhe shqyrtuar me vëmendje të tria draftet, kam dalë në një konkluzion, të cilin do ta përkufizoja me emrin ‘projektligj integral‘", tha Biberaj për një agjenci lajmesh. Ai shpreson që drafti "i tij" do të gjejë mbështetjen e relatorëve të propozuar tashmë nga Komisioni i Ligjeve, si dhe frymën e bashkëpunimit me grupet e tjera të interesit, për të përgatitur një variant final, që do të ishte i pranueshëm nga grupet parlamentare.

Nisur nga fakti se vitet e fundit është trumbetuar shumë për hapjen e këtyre dosjeve, zoti Biberaj u shpreh se "gjatë këtyre 18 viteve është bërë zhurmë e madhe politike, por për hir të së vërtetës PD-ja e ka hapur këtë proces, i cili u ndërpre në vitin 1997, për shkak të ardhjes së të majtës në pushtet". Sipas tij, "shoqëria shqiptare ka nevojë të njohë të kaluarën e saj dhe sidomos të kaluarën e politikanëve dhe përfaqësuesve të niveleve të larta të administratës publike, të sistemit të drejtësisë, drejtuesve të universiteteve. Mendoj, vijoi deputeti Biberaj, se ky është një obligim i klasës politike që drejton Shqipërinë pas viteve ‘92".