ALTIN VORPSI
Malta vjen në përballjen me Shqipërinë pas katër humbjeve rresht
Dushan Fitzel: Ne presim shumë nga kombëtarja
Ndeshja e parë, që është e planifikuar në kalendarin ndërkombëtar për vitin 2009, e vlefshme për grupin A të ndeshjeve eliminatore për Kupën e Botës në Afrikën e Jugut, do të jetë ajo mes Shqipërisë dhe Maltës, të mërkurën më 11 shkurt në stadiumin kombëtar “Ta'Qali” në orën 19:30. Kundërshtarët e kuqezinjve, Malta, ndodhen në vendin e fundit të grupit 1 dhe madje ishullorët nuk kanë arritur të shënojnë asnjë gol. Ndërsa nga porta e tyre u është dashur që ta nxjerrin sferën plot 11 herë. Por ashtu siç paralajmëroi edhe trajneri i kombëtares sonë, Ari Han, gjatë konferencës për shtyp, ekipi ishullor ndaj Shqipërisë sheh mundësinë e vetme për të marrë tri pikët. Ndërsa mediat malteze e kanë konsideruar si shumë delikate ndeshjen me Shqipërinë, e para për të dy skuadrat në vitin 2009, por e dyta përballje direkt në kualifikueset e Botërorit 2010, pas asaj të 10 shtatorit të vitit 2008, ku kombëtarja jonë fitoi thellësisht. Malta vjen në përballjen me Shqipërinë pas katër humbjeve rresht, madje pa shënuar qoftë dhe një gol të vetëm e duke pësuar 11 të tillë (3 prej Shqipërisë). “Është pa dyshim një ndeshje delikate, - shkruhet në sitin zyrtar të gazetës malteze “Malta Independent Online”, - jo vetëm se paraqet mundësinë e vetme për të shlyer disi gabimet për fillimin e pakënaqshëm me katër humbje rresht në ndeshjet e grupeve, por edhe sepse kombëtarja jonë (ajo malteze) do të përballet me një vend, i cili sigurisht nuk është një ‘kockë’ e lehtë edhe për vendet me futboll të zhvilluar, edhe nuk është konsideruar si një nga ekipet më të mira në renditjen aktuale ndërkombëtare”. Specialistët maltezë e pranojnë jo pa dëshpërim faktin e supermacisë së Shqipërisë ndaj përfaqësueses së tyre. “Në fakt, - shkruhet në “Malta Independent Online”, - barazimi pa gola i Shqipërisë kundër Portugalisë në kualifikueset e Kupës së Botës tetorin e kaluar dhe pesë pikët e marra në ndeshjet e tyre në grup përbëjnë një evidencë të qartë të fuqisë së tyre futbollistike si komb”. Në analizën e saj në prag të ndeshjes, gazeta malteze tregon edhe keqmenaxhimin nga ana e skuadrës të ndeshjeve të fundit. “Në ndeshjet e fundit ne nuk arritëm të menaxhonim egon tonë përmes performancës sonë të shëmtuar, duke mos marrë rezultate. Por, ne sërish kemi mundësinë ta ndryshojmë këtë, kësaj radhe kundër shqiptarëve. Është një mundësi. Do të ishte shumë mirë për ekipin tonë, të mos e humbisnim këtë mundësi”. Trajneri Dushan Fitzel, gjithnjë sipas gazetës ishullore, do të angazhohet në mbështetjen e aftësive fizike, teknike e mendore të lojtarëve maltezë, në mënyrë që të çlirojë lojtarët pas serisë negative pa shënuar gol në ndeshjet e fundit (Goli i fundit i Maltës është shënuar në miqësoren kundër Austrisë në humbjen 5-1, më 30 maj 2008). Në Maltë, ashtu si kudo me skuadrat e vogla, besojnë shumë të tifozeria në stadiumin kombëtar “Ta’Qali”, për të mbështetur Mifsudin me shokë. “Ne e dimë se lojtarët tanë kanë cilësi, por kanë nevojë për mbështetje. Ne do ta mbështesim ekipin tonë ‘të kuq’, duke shpresuar se në këtë ndeshje do të arrijmë rezultatin e shpresuar”.

11 kamera

“Where's Everybody”, pasi është zgjedhur nga Infront Sports e Zvicrës për të prodhuar sinjalin televiziv satelitor të ndeshjeve, është në procesin e zgjedhjes dhe prodhimit të 5 takimeve në shtëpi të Maltës për eliminatoret e Kupës së Botës 2010 mes tyre dhe ndeshja e së mërkurës Malta-Shqipëri në “Ta' Qali”. Ndeshja e futbollit Malta-Portugali e luajtur në 6 shtator u transmetua në 17 vende në gjithë botën, ndërkohë që dhe ndeshja Maltë-Hungari e luajtur në 15 tetor, u pa nga miliona teleshikues. Për ndeshjen Maltë-Shqipëri, “Where's Everybody” do të ketë në dispozicion një skuadër prej 40 personash staf teknik që do të punojnë për të siguruar suksesin e plotë në prodhimin e kësaj ndeshjeje. Skuadra përfshin në gjirin e saj teknik inxhinierë, 11 kameramanë, 2 drejtorë, gjenerues personazhesh, menaxher fushe, një person që merret me statistikat e ndeshjeve si dhe dy operatorë të sistemit të lëvizjes së ngadaltë, EVS. Kjo teknologji e fundit siguron prodhim të një cilësie shumë të mirë duke i mundësuar teleshikuesve të kapin lëvizje të rëndësishme dhe transmetim të shkëlqyer të ndeshjes. Pajisjet teknike përfshijnë gjithashtu dhe tre aparatë me lente që kanë një rreze zmadhimi 70 herë në distancë të afërt. Ndeshja do të transmetohet drejtpërsëdrejti nga ora 19:30 deri në 22:30 dhe “Where's Everybody” do t’i ofrojë shërbimin e saj televizionit shqiptar nga stadiumi në “Ta' Qali”, mundësisht nëpërmjet SNG-së (Satellite News Gathering).



FSHV-ja përcakton asamblenë zgjedhore

Federata Shqiptare e Volejbollit (FSHV) do të zhvillojë në datën 13 shkurt zgjedhjet e reja sipas statutit-tip, pas dorëheqjes së presidentit të saj, Gjergj Liqejza. Gjithçka bazohet në vendimin e Ministrisë së Turizmit, Kulturës, Rinisë dhe Sporteve për të zhvilluar zgjedhjet edhe në Federatën Shqiptare të Volejbollit. Statuti-tip i FSHV-së është në funksionim që prej vitit 2007, në bazë të të cilit janë kryer dhe zgjedhjet e komitetit ekzekutiv aktual. FSHV-ja kishte parashikuar vetëm zgjedhjen e presidentit, pas dorëheqjes së Gjergj Liqejzës dhe të anëtarit të komitetit ekzekutiv, Altin Martiri, që tani është në rolin e trajnerit, por këtë radhë zgjedhjet e reja do të jenë të plota, si për presidentin, dhe për komitetin ekzekutiv. Drejtuesit e Federatës së Volejbollit kanë përcaktuar datën 13 shkurt për organizimin e asamblesë zgjedhore, në bazë të statutit, si dhe do të bëhet analiza e punës së vitit 2008 për sportin e rrjetës. Burime pranë FSHV-së bëjnë me dije: “Për urdhrin e ministrisë janë informuar klubet dhe shoqatat sportive të federuara, të cilat do të sjellin kandidaturat e tyre për anëtarë të komitetit ekzekutiv dhe presidentin, post i cili është ende vakant dhe aktualisht drejtohet nga zv.presidenti Agron Duka”.



Bushati grumbullon kombëtaren U-21

Trajneri i kombëtares shqiptare U-21, Artan Bushati, ka bërë të ditur sot listën e 18 lojtarëve që do të grumbullohen për tri ditë në kuadër të përgatitjeve për Kampionatin Evropian U-21. Sipas FSHF-së “në mungesë të një ndeshjeje miqësore, trajneri Artan Bushati ka menduar të zhvillojë një stërvitje treditore me lojtarët e rinj”. Bushati ka grumbulluar për këto stërvitje vetëm lojtarë nga kampionati shqiptar, duke u dhënë mundësinë disa talenteve të reja të shijojnë grumbullimin e parë me kombëtaren Shpresa.

Disa nga emrat e rinj të grumbulluar nga Artan Bushati janë: Kadri Birja i Shkumbinit, Migen Metani i Tiranës, si dhe Erion Vuçaj nga Vllaznia. Grumbullimi treditor do të nisë ditën e hënë në orën 13:30 në stadiumin kombëtar “Qemal Stafa”.

Lista e kombëtares U-21

1. Shpëtim Mocka Flamurtari

2. Kadri Birja Shkumbini

3. Polizoi Arbëri Lushnja

4. Renato Malotaj Partizani

5. Ditmar Bicaj Partizani

6. Franc Veliu Flamurtari

7. Bazjon Tragaj Besa

8. Migen Metani Tirana

9. Olsi Teqja Kastrioti

10. Emiliano Vila Teuta

11. Sabien Lilaj Tirana

12. Erando Karabeci Partizani

13. Jozef Thana Teuta

14. Erion Vuçaj Vllaznia

15. Renato Hyshmeri Elbasani

16. Vilfor Hysa Teuta

17. Elhan Galica Flamurtari

18. Ardit Shehaj Flamurtari

Grupi 10

Shqipëria

Bjellorusia

Skoci

Austri

Standart