Tiranë -Policia e Shtetit në një reagim të minutës së fundit, për ngjarjen e ndodhur në Kukës, ka bërë të ditur se dy policët janë vrarë, në momentin që ata po merrnin shërbimin. “Dy policët, Shkëlzen Dobrushi dhe Ramadan Hila janë vrarë në krye të detyrës teksa po merrnin shërbimin e rojës në fshatin Shemri të Kukësit"-deklaroi Klodian Branko, zëdhënësi i Policisë së Shtetit.

Sipas komunikatës së Policisë, dy policët e vrarë natën e shkuar në Shëmri të Kukësit, kishin ngritur një padi ndaj shtetasit Afrim Hasani. Sipas policisë, padia ishte ngritur më 17 mars, ndërsa shtetasi në fjalë ishte shpallur në kërkim nga forcat e rendit.

Padia për vrasësin Hasani, ishte ngritur për shkatërrim prone. Por, kjo u ka kushtuar shtrenjtë dy policëve, të cilët janë vrarë në mënyrë barbare mbrëmjen e shkuar, në një postbllok, teksa po merrnin detyrën. Kështu, i vrarë mbeti shtetasi, me uniformë policie, Shkëlzen Dobrushi dhe Ramadan Hila.

Ndërkohë, policia ka bërë të ditur se për të gjithë ata që japin informacion për autorin e ngjarjes do të marrin shpërblim 5o mijë euro. Për të gjithë ata që kanë informacion mbi autorin, Policia e Shtetit ka vënë në dispozicion, dy numra telefoni si 0694106303 dhe 0694106434.

start

Kukës -Kryeministri Sali Berisha i ka dërguar një telegram ngushëlli i familjarëve të policëve të vrarë. “Të dashur fëmijë, bashkëshortë, prindër dhe familjarë të inspektorëve, Shkëlzen Dobrushi dhe inspektor Ramadan Hila, të rënë në detyrë;Në emrin tim dhe të qeverisë shqiptare, ju shpreh ngushëllimet më të thella për humbjen e jetës së prindërve, bashkëshortëve dhe bijve tuaj më të dashur, Shkëlzen Dobrushit dhe Ramadan Hilës. Rënia e tyre me nder, në krye të detyrës, në mbrojte të jetës, sigurisë dhe rendit të qytetarëve shqiptarë, është një humbje e madhe, jo vetëm për familjen tuaj të nderuar, por për të gjithë Policinë e Shtetit, Kukësin dhe mbarë Shqipërinë”-shkruan në mesazh kryeministri Berisha.

Kryeministri ka shprehur mbështetjen e tij dhe të qeverisë që drejton për Policinë e Shtetit. “Inspektorët, Shkëlzen Dobrushi dhe Ramadan Hila u martirizuan dje për të fituar pavdekësinë, në altarin e të rënëve të kombit, i cili do t’u jetë atyre përjetë mirënjohës. Ndërsa ai që shkrehu mbi ta zjarrin vdekjeprurës, do të marrë ndëshkim shembullor dhe të merituar, për aktin e tij makabër”-vijon Berisha.

Duke ndarë me ju dhimbjen e thellë dhe pikëllimin e madh, së bashku me qeverinë time-vijon Berisha-ju shpreh Juve solidaritetin më të plotë dhe lutem me ju që shpirtrat e bijve tuaj të dashur, që flijuan rininë dhe jetën në emër të detyrës, të gjejnë paqen e merituar.

start