Në Afrikën e Jugut mund të ketë vend edhe për "outsider". Botërori 2010 fsheh futbollistë si Milito, Villa, Luis Fabiano, Forlan, Van Persie e Eto'o, që gjithmonë janë të gatshëm të shpërthejnë. Analistët e futbollit e shohin portugezin përpara argjentinasit, të cilin nuk e shohin si vendimtar, kur luan për përfaqësuesen e tij.

Anglezi ka qenë stabël tek ekipi i Capellos, ndërsa spanjolli vjen nga disa lëndime që e përshkuan gjatë sezonit që shkoi, por ai i ka dhënë shumë Spanjës, në Europianin 2008.

Nëse këta të katër vlerësohen si yje, kjo nuk do të thotë se në Botëror nuk do të shpërthejnë futbollistë të tjerë, siç bëri David Villa në Europianin 2008, kur u shpall golashënues me Spanjën.

Pasi përfundoi epoka e Ronaldos (Luis Nazario), Brazili e ka në dispozicion një sulmues tjetër të rrezikshëm: Luis Fabiano. Ai vlerësohet 30 milionë euro, ndërsa "O' Fabuloso" është titullar i padiskutueshëm në ekipin e Dungas dhe është kandidat për golashënues të këtij botërori.

Nuk duhet anashkaluar David Villa, që kushton sa ai. Është një sulmues, në përgjithësi, që ka demonstruar se është i rrezikshëm, posaçërisht në pjesën e fundit të sezonit, i njëjtë si uruguaiani Diego Forlan, i cili ia mundësoi ekipit të tij, Atletico Madrid, triumfin në Europa League.

Samuel Eto'o, edhe pse nuk shënoi shumë gola sivjet me Interin, te Kameruni është lider dhe të gjithë presin nga ai. Në situatë më të vështirë gjendet Didier Drogba: sulmuesi i Chelsea ka pësuar lëndim dhe tifozët e Bregut të Fildishtë mbeten të brengosur për gjendjen e tij.

Më pas, aty gjendet edhe Diego Milito. Ashtu siç shpërtheu tek Interi, ai, bashkë me Messin, mund ta formojë një dyshe 'vrasëse' të sulmit argjentinas. Problemi është që për trajnerin Maradona, "El Principe" është sulmuesi i pestë, pas Messit, Higuainit, Tevezit, Agueros e Palermos.

Në listën e sulmuesve që mund të shkëlqejnë në Botëror gjenden edhe ata holandezë, Van Persie, Kuyt e Huntelaar. Kurse, italianët presin më së shumti nga Gilardino dhe Di Natale, derisa gjermanët do të përqendrohen te sulmuesi që gjithmonë di të jetë i rrezikshëm në kompeticione të tilla, Miroslav Klose.

Shkurt
FIFA 2010, në botëror do të fitojë Spanja

Do të jetë Spanja që do të fitojë botërorin e Afrikës 2010. Simulimi është bërë nga FIFA 2010 World Cup, videoloja më e famshme e botës.

Ekspertët e shtëpisë prodhuese "EA Sports" ka luajtur të gjitha ndeshjet me kampionët virtualë, duke nxjerrë edhe kronikën e finale, që do të jetë kundër Brazilit dhe do të përfundojë 3-1.

"EA Sports" ka arritur të parashikojë me sukses fituesin e kampionatit të fundit të futbollit amerikan.

Ëndrra e Mesit: Ta ngre trofeun me Maradonën

Ëndrra e Mesit: Ta ngre trofeun me Maradonën

Lionel Mesi bën elozhe për trajnerin e tij: "Në fillim ishte e çuditshme ta kishe trajner, ishte diçka impresionuese, por të gjithë u ambientuam dhe kjo u kthye në normalitet. Me atë nuk kam asnjë problem, madje Maradona më ka qëndruar gjithnjë pranë, më ka dhënë besim dhe është e mrekullueshme të punosh me të".

Po ashtu ka përgënjeshtruar edhe faktin se kur luan për Argjentinën, talenti i tij nuk bie në sy: "Nuk është e vërtetë.

Më jep 'karta biankën', ashtu siç më ndodh te Barcelona. Ëndrra ime është të ngre Kupën e Botës me Diego Armando Maradonën në krahun tim". Ndërkohë që dje, Argjentinës i është bërë një kontroll antidoping surprizë.

Testit i janë nënshtruar 8 lojtarë: tre portierët Andujar, Pozo e Romero, mesfushorët Garse e Maksi Rodriguez dhe sulmuesit Milito, Aguero e Tevez. Sipas FIFA-s, kontrolle të tilla surprizë do të vazhdojnë gjatë gjithë kompeticionit.

Gjermanët vonohen në Afrikë prej Shakirës

Futbollistët e Gjermanisë, të dielën në mbrëmje u nisen për në Afrikën e Jugut, me vonesë prej 30 minuta. Yjet e Joakim Loev ishin në aeroplan dhe në vendet e tyre, mirëpo piloti nuk kishte leje që të niset, pasi që në bordin e avionit nuk ishte ylli nga Kolumbia, Shakira. Ajo u vonua për 30 minuta për shkak të aterimit të vonshëm të aeroplanit nga Madridi.

Aeroplani nga Frankfurti nuk mundej të niset, pasi pop ylli nga Kolumbia duhej të ishte në aeroplan dhe të premten duhet të këndojë himnin zyrtar të Botërorit. Shakira përmes altoparlantit të aeroplanit kërkoi falje ekspeditës gjermane dhe u dëshiroi fat në Botëror. Pas aterimit, futbollistët u dërguan në hotelin "Velmore Grand" në afërsi të Pretorisë, ku do të qëndrojnë gjatë turneut.

Afrika e Jugut e gatshme për të pritur kompeticionin

Afrika e Jugut është deklaruar e gatshme për të organizuar Kampionatin Botëror, të parin në kontinentin e Afrikës. Këtë e ka thënë presidenti i Afrikës së Jugut, Jacob Zuma, në një konferencë për media në Pretoria.

"Ne jemi shumë të kënaqur dhe plot nder që presim botën në shtetin tonë, për një ngjarje historike dhe të jashtëzakonshme. Afrika e Jugut është më shumë se e gatshme. Për ne Kampionati Botëror tashmë ka nisur", - ka thënë Zuma, shkruan agjencia "AFP".

Pesë ditë para ndeshjes së parë të Botërorit 2010, mes Afrikës së Jugut dhe Meksikës, presidenti i FIFA-s, Sepp Blatter, ka thënë se Afrika në përgjithësi duhet të përgëzohet për punën që ka bërë për organizim. "Entuziazmi, gëzimi që e ka kapluar gjithë shtetin në javët e fundit, nuk është parë që kur presidenti Nelson Mandela u lirua nga burgu në vitin 1990.

Eksplodimi i krenarisë shtetërore ka qenë përfitimi më i madh", ka thënë Zuma. Edhe presidenti i FIFA-s, Blatter, është treguar shumë i lumtur që besimi dhënë Afrikës së Jugut i është shpaguar.

"Të sjellësh Kampionatin Botëror në Afrikë të Jugut do të thotë t'i besosh Afrikës së Jugut. Natyrisht, nuk është çdo gjë perfekte. Perfeksionin nuk mund ta arrijë askush. Botërori i Afrikës dhe gjithë puna për të organizuar këtë ngjarje është bërë në këtë vend. Komplimentet duhet t'i jepen Afrikës së Jugut dhe gjithë kontinentit afrikan", - ka thënë Blatter.

Kalendari i ndeshjeve
Grupi A

11/6 Johannesburg (16:00): Afrike e Jugut - Meksikë
Città del Capo (20:30): Uruguai - Francë
16/6 Pretoria (20:30): Afrika e Jugut - Uruguai
17/6 Polokëane (13:30): Francë - Meksikë
22/6 Rustenburg (16:00): Meksikë - Uruguai
Bloemfontein (16:00): Francë - Afrika e Jugut

Grupi B

12/6 Johannesburg (13:30): Argjentinë - Nigeri

shekulli