Dorëzohet qeveria, gati amnistia fiskale per 400 milione euroNga Genc Kondi
d.b/GazetaShqiptare/Balkanweb
14/06/2008
Dje u njoftua zyrtarisht se Ministria e Financave po përgatit një draft për amnisti fiskale, duke bërë një seleksionim, për të favorizuar me këtë masë bizneset me CV-në më të mirë dhe për të ashtuquajturit “të pagjeturit”. Version multimedial i ketij lajmi
Ka dështuar qeveria Berisha në angazhimin e saj për të mbledhur me çdo mjet, pjesën “e keqe” të ngarkesës fiskale, të cilën kompanitë e biznesit ia detyrojnë administratës tatimore dhe asaj doganore. Dje u njoftua zyrtarisht se Ministria e Financave po përgatit një draft për amnisti fiskale, duke bërë një seleksionim, për të favorizuar me këtë masë bizneset me CV-në më të mirë dhe për të ashtuquajturit “të pagjeturit”. Sipas të dhënave zyrtare të kësaj Ministrie, aktualisht një grup ekspertësh po punon në drejtim të krijimit të një drafti, pasi një numër shumë i madh biznesesh kanë punuar prej vitesh në të zezë dhe u janë shmangur taksave. Burime zyrtare të këtij dikasteri thanë se drafti synon amnistinë fiskale për një grup të konsideruar biznesi, ku përfshihen bizneset me borxhet e këqija, administratorët e të cilëve nuk kanë kryer aktivitet kriminal, si dhe ata që nuk gjenden dot.
Angazhimi
Ministri i Financave, Ridvan Bode deklaroi në fillim të mandatit qeveritar se detyrimet e pambledhura, të trashëguara, llogariten në rreth 400 milionë euro, taksa të papaguara nga bizneset. Duke akuzuar qeveritë e mëparshme të majta për neglizhencë dhe korrupsion. Në këtë mënyrë, Ekzekutivi Berisha do të vinte në pushtet me një angazhim të fuqishëm për të zbuluar dhe ndëshkuar ata që kishin shmangur pagimin e detyrimeve ndaj shtetit, ose “të privilegjuarit e qeverive rozë”. Rezultojnë 2,5 miliardë lekë detyrimet, që subjekte të ndryshme i kanë administratës doganore. Këtë e ka deklaruar publikisht në vitin 2005 kreu i ri i Doganave shqiptare, Përparim Dervishi, i cili vuri në dukje se e mori postin së bashku me një faturë shumë të rëndë debiti. Drejtori i përgjithshëm nuk komunikoi emra, por theksoi se në të gjithë vendin, drejtorive rajonale, kompanitë e ndryshme iu detyroheshin 25 milionë USD. Drejtori i DPD-së njoftoi një “kompromis” shumë të shkurtër, pas të cilit dora e autoriteteve shtetërore nuk do të toleronte më. “Ne kemi menduar t’u japim një afat kohor subjekteve debitore prej një jave”, - theksoi ai, duke shtuar se në këtë periudhë ato ftohen të paraqiten vullnetarisht e të shlyejnë detyrimet ndaj Doganave. Në të kundërt, autoritetet doganore do të zbatojnë të gjithë sanksionet që njeh ligji. Nga ana e saj, dega e Tatim-Taksave Tiranë bëri më 2005 në prokurori një kallëzim penal për 41 kompani, por që u kthye shumë shpejt në një proces edhe ndaj organeve tatimore që kishin lejuar një situatë të tillë.
“Goditja”
Më pas, kjo vazhdoi me një aksion të bujshëm të tatimorëve të Tiranës, që deklaruan se “piketuan” mbi 60 kompani që kishin kaluar çdo afat ligjor për pagimin e detyrimeve të prapambetura ndaj Tatimeve të kryeqytetit. Pas verifikimeve doli se, në total, këto subjekte kishin për t’i paguar shtetit rreth 100 milionë lekë, shumica e tyre “debitorë të këqij”, të cilët kishin një kohë shumë të gjatë që nuk po paguanin atë çka detyroheshin, një pjesë madje, që para vitit 2000. Në përputhje me konstatimin e këtij fakti, Policia Tatimore e Tiranës mori urdhër ekzekutimi për bllokimin e aseteve të këtyre 63 kompanive, të gjitha biznes i mesëm ose i vogël, por që kishin krijuar këtë “boshllëk” kolosal në vite në arkën e tatimorëve kryeqytetas. Burime të Drejtorisë së Përgjithshme të Tatimeve vunë në dukje për “Gazetën” se kishin lajmëruar të gjitha subjektet debitorë dhe atyre iu ishte dhënë një afat i fundit shlyerjeje prej 30 ditësh, pas të cilit policët tatimorë do të “vulosnin” aktivitetet e tyre. Subjektet që pritej të bllokoheshin brenda një muaji ushtronin aktivitet në ndërtim, tregti dhe në sektorin e shërbimeve. Parashikohej që bllokimi të shërbente si mjet detyrimi për grumbullimin e detyrimit të prapambetur, në të kundërt, me vendim gjyqi, ai të kthehej në sekuestër dhe asetet e debitorëve do t’i kalonin në pronësi shtetit, që mund t’i përdorte vetë, apo t’i shiste ato në ankand. Që prej tre vjetësh nuk u dëgjua më asgjë lidhur me sekuestro apo bllokime për detyrime të pashlyera.