Gërdeci", vjen fletëthirrja e parë për Mediun pa imunitet
Pas Diverolit nga SHBA, hetuesit kërkojnë dëshminë e ish-ministrit të Mbrojtjes: Këto ditë, seanca e pyetjes

Prokuroria e Përgjithshme ka bërë gati fletë-thirrjen e parë për ish-ministrin e Mbrojtjes, Fatmir Mediu, që pas heqjes nga Kuvendi të imunitetit të tij. Deputeti republikan Mediu pritet të japë sërish shpjegime për dosjen "Gërdeci", në përpjekje për të hedhur sadopak dritë mbi ngjarjen e 15 marsit, e cila u mori jetën të paktën 26 personave. Burime nga akuza qendrore thanë se Mediu do të thirret në prokurori këto ditë, në cilësinë e personit ndaj të cilit po kryhen hetime. Por zyrtarët e akuzës qendrore nuk saktësojnë nëse ndaj ish-ministrit do të ngrihen akuza apo jo. "Gjithçka është nën hetim dhe në sekret të plotë", thanë burime nga akuza. Hetuesit e çështjes konfirmojnë se Mediu do të japë shpjegime pasi të ketë mbërritur nga drejtësia amerikane dëshmia e pronarit të AEY-së, Efraim Diveroli. "Po presim dëshminë e Efraim Diverolit për municionet e marra në Shqipëri. Pritet të vijë sot ose nesër. Pas kësaj procedure do t‘i dërgojmë Mediut fletë-thirrjen për të dëshmuar, të cilën e kemi gati tashmë", pohuan zyrtarët e akuzës qendrore. Sipas tyre, hetimi për ish-ministrin e Mbrojtjes, Fatmir Mediun, do të kryhet si për të gjithë shtetasit e Republikës së Shqipërisë. Ata deklarojnë se veprimi i Kuvendit i hap rrugë hetimit të plotë dhe të gjerë për ngjarjen e 15 marsit. Por hetuesit kanë arritur të provojnë se ekzistojnë të dhëna që krijojnë dyshimin që Mediu ka kryer veprime e mosveprime me dashje, në kundërshtim me ligjin, që përbëjnë mospërmbushje të rregullt të detyrës së tij si ministër i Mbrojtjes. Ka të dhëna se veprimet dhe mosveprimet e kryera në kundërshtim me ligjin nga ish-ministri kanë lidhje me ngjarjen e ndodhur në Gërdec. Kryeprokurorja, në kërkesën që i drejtoi Kuvendit, parashtron disa prova që hedhin dritë mbi përgjegjësinë e Mediut në ngritjen e fabrikës në Gërdec. Sipas saj, nga hetimi rezulton se në muajin shkurt të vitit 2006, drejtori i ndërmarrjes së Ministrisë së Mbrojtjes, "Military Export Import Companny" (MEICO), Ylli Pinari, ka rënë në kontakt me përfaqësuesin e shoqërisë amerikane, "Southern Ammunition Company Inc" (SAC), Patric Henry III, i cili ka shfaqur interes për municionet me gëzhojë tunxhi që dispononte ushtria shqiptare dhe që nuk ishin pjesë e armatimit të saj. Në datën 5 korrik 2006 është vënë në dijeni ish-ministri i Mbrojtjes, Mediu, i cili ka filluar një proces përgatitjeje me procedura të përshpejtuara, që synonte realizimin e projektit të ofruar nga kompania amerikane SAC.

Ndërkohë, hetuesit shqiptarë dyshojnë se për të fshehur identitetin e armëve, Diveroli dhe zyrtarët shqiptarë bënë një ripaketim të tyre, duke i hequr nga arkat e vjetra kineze e duke i rivendosur në disa arka të reja plastike. Ky proces i ka kushtuar shtrenjtë Diverolit, drejtorit të MEICO-s, Ylli Pinarit, dhe zyrtarëve të Ministrisë së Mbrojtjes. Prokuroria e Përgjithshme shqiptare pritet të ringrejë akuzën e falsifikimit të vulave dhe stampave të personave të mësipërm, e cila rrezikon një dënim maksimal prej 7 vjetësh burg. Për këtë akuzë, Kryeprokurorja Ina Rama i ka kërkuar Prokurorisë së SHBA-së informacione më të hollësishme për dëshminë e kreut të AEY-së. Hetuesit shqiptarë deklarojnë se procesi i ripaketimit nisi me firmën e biznesmenit shqiptar, Kosta Trebicka, por më pas qeveria shqiptare preferoi të fuste në mes një sekser. Ai ishte Henri Tomei, person i njohur si trafikant ilegal armësh, i cili do të rriste artificialisht çmimin e armëve. Dhe kjo rritje artificiale e çmimit ishte tmerrësisht e madhe, nga 18 në 42 dollarë për një arkë me municione. Këto para dyshohet se janë ndarë mes zyrtarëve shqiptarë, Diverolit dhe Henri Tomeit. Por për të mbyllur këtë aferë, ata kishin nevojë për një paketues të besuar. Në këto kushte, Ylli Pinari, drejtori i MEICO-s, largoi forcërisht Kosta Trebickën nga biznesi i paketimit dhe mori një të njohurin e tij të vjetër, Mihal Delijorgjin. Ky i fundit është implikuar së bashku me Pinarin dhe Mediun edhe në çështjen e Gërdecit.
Shqip