Me kavaletat e plehut, Edvini nis turin e ri të ndotjes
(10.01.2008)
Përmbytja e kryeqytetit nga plehrat nuk mjafton për egon antiqytetare të bashkiakut të PS-së. Dje Edvini njoftoi një udhëtim të ri njëmujor nëpër fshatra, duke u arratisur nga aksioni reformator i Tiranës, për t’u përqendruar në eksportimin e mafias së plehrave edhe në periferitë socialiste dhe qendrat urbane që s’qeverisen prej tij


Tashmë është zyrtare. Pas përmbytjes së Tiranës me malet e plehrave, Edvini nuk mund të rrijë as edhe një minutë të vetme pa e përcjellë këtë “përvojë” edhe nëpër rrethe, prandaj ka shpallur se po rinis një tur njëmujor në fshatrat e zonat jeshile të vendit, për të treguar se si mund të grumbullohen plehrat, bile edhe se si mund të përfitohet prej tyre politikisht. Tezën Rama e ka trajtuar gjerë e gjatë edhe në debatin “5 pyetje nga Babaramo”, ku ai iu ankua moderatorit se ishte keqkuptuar dhe atakuar padrejtësisht nga disa media dhe analistë pranë tyre për të fenomenin e jeshilimit të Partisë Socialiste dhe vizionit ambientalist të saj. Sipas tij, këto media dhe analistë nuk kishin mundur që të kapnin mesazhin dhe të gjenin lidhjen midis problemeve ambientaliste në fshatra dhe në tubimet e tij me fshatarët dhe filozofisë ambjentaliste të konfirmuar si të suksesshme dhe të mbështetur edhe nga socialdemokratët, për të cilët është bërë me dije se do të vizitojnë Shqipërinë në fund të muajit janar, për të asistuar programin që po harton partia më e madhe e opozitës. Madje Rama u nervozua me moderatorin që e pyeti se si mund të ndihmonin ekspertët socialdemokratë të Mynihut, kur atyre u dërgoheshin me e-mail rezultatet e enciklikës nëpër fshatra dhe mendimet e shprehura nga fshatarët për ekologjinë.
Tashmë kreu i PS-së me enciklikën për bujqësinë dhe atë për ambientin, ka marrë përsipër të ndihmojë fermerët shqiptarë dhe të plotësojë boshllëqet e punës së pamjaftueshme sipas tij të Ministrisë së Bujqësisë me anë të modernizimit dhe kompensimit të zinxhirit të tokave bujqësore. Për këtë arsye me projektet për landifilld-in e Ndroqit dhe me përgatitjen e pjesshme të plehrave urbane të Tiranës për kompostim, (në një kohë që vetëm 3 vite më parë u angazhuar fort për të sabotuar projektin italian të stabilimentit të mbetjeve urbane në Kashar), Edvini ka konkluduar se e ka zgjidhur përfundimisht problemin e plehërimit dhe ndihmës për fermerët shqiptarë. Kësisoj, ai do t’i ndihë uljes së kostos së plehërimit me pleh organik të kafshëve dhe me DAP, duke shënuar që në opozitë suksesin e parë që do t’i mundësojë sigurimin e votave të fshatarëve. Thënë ndryshe, shndërrimi i Tiranës në një shesh gjigand kavaletash plehu, të shpërndara në të gjithë territorin e saj dhe ruajtja e pastërtisë së sipërfaqes së tokës së fermerëve nga plehrat është kurorëzim i platformës ambientaliste në 98 përqind të territorit të republikës. Andaj me plehun e kompostuar nëpër lagjet dhe minibashkitë e Tiranës, Rama ka vendosur të plehërojë fidanët e mollëve të dërguar në komunën e Divjakës, zënia e të vilëve nuk ka më gjasë që të dështojë. Me këtë rast plotëson edhe zysh Artës, deputetes së zonës. Por burimet pranë tij bëjnë të ditur se një pjesë të konsiderueshme të plehut të kompostuar brenda territor të bashkisë së Tiranës, Rama ka vendosur që ta ruajë dhe t’ua furnizojë në kohën e duhur fshatarëve të Rrëmbecit, për të cilët shprehu një sensibilitet të skajshëm. Njëkohësisht shumimi i kalavetave të plehut dhe zgjatja e kohës së kompostimit të tyre me preteksin e pengesave të Agjencisë së Prokurimeve Publike, do të krijojë me shpejtësi klimën napoletane të Tiranës dhe mundësinë e zgjidhjes allanapolitançe të saj, ku do të ndihin kamorristët shqiptarë të lidhur me kryebashkiakun. Këta që tani kanë shprehur gatishmërinë për ta zgjidhur këtë krizë duke përdorur si kontrast negativ precedentin e pakëndshëm napolitan.

gazeta 55

Edvini nuk ka kohe te merret me plehrat se po merret me "implementiiiimiiiin" e politikave te rejaaaaa.