Aristir Lumezi

"Unë nuk jam politikan! Dua të them këtë sot me zë të lartë drejtpërdrejt. Unë jam një qytetar. Jam një qytetar si ju, si shumë të tjerë. Jam një qytetar që nuk dorëzohem", tha Rama. Këto fraza të Ramës bënë që të pranishmit të shihnin në sy njëri-tjetrin, pasi politikani, lideri i opozitës shqiptare po deklaronte se nuk ishte politikan, por një qytetar si gjithë të tjerët. Lajthitje apo lapsus, i thënë me një pasion aq të madh, udhëheqësi jo politikan, krijoi çoroditje tek ata socialistë që e ndiqnin me kujdes. I kuotuar dhe votuar nga socialistët si kryetari i tyre, kryeministri i ardhshëm i tyre, Rama dje doli nga retorika politike dhe u tha socialistëve se ai më shumë se politikan është qytetar. Dje Rama foli drejtpërdrejt me qytetarët. "Unë nuk jam politikan"!
Historia
Festa e djeshme e FRESSH-it, ndryshe nga herët e tjera, ishte dhe një moment stacion për të treguar se historia e tij, me pak nga ata që e themeluan dhe e çuan deri aty, hap një dritare me njerëzit e të ardhmes në PS. Politika e re në koncept dhe në njerëz kishte dje vendin më të mirë për ta treguar këtë ndryshim rrënjësor. E ndërsa historia e FRESSH-it u përfaqësua dhe u përshëndet me një nga themeluesit e tij, Pandeli Majko, pasi të tjerët ishin "harruar" të thirreshin, e sotmja dhe e ardhmja në PS pati disa nga zërat e rinj, si Edlira Haxhiymeri, Ledi Shamku, Sajmir Tahiri dhe vetë kryetarja e forumit, Megi Ajtyresa. Duke analizuar politikën e re që të rinjtë duhet të ndjekin, Rama kërkoi kontributin e tyre si qytetarë të lirë të këtij vendi, me vetëdije dhe larg ndikimeve të politikës së vjetër. "Rinia të mos jetë më viktimë e një politike të vjetër që kujtohet për ta vetëm kur ka fushata elektorale, viktimë e politikanëve të vjetër, për të cilat shqiptarët dhe shqiptaret janë një turmë nga e cila dalin vetëm vota dhe jo individë, me talentin, me pasionin me aftësitë e tyre ndaj të cilëve një shtet i drejtë dhe një qeveri dinjitoze duhet të përgjigjet një për një", tha Rama.
Ëndrra ime
Rama e ka cilësuar PS-në si një hapësirë ku dialogohet, ku debatohet, ku ballafaqohen mendime, ide, ku dëgjohen dhe shkruhen shqetësime, kërkesa, ankesa, ëndrra. "Eshtë një hapësirë ku së bashku ne jemi më shumë dhe sa më shumë të jemi aq më pranë e kemi Evropën, jo duke shkuar në Evropë, por duke e sjellë Evropën këtu në shtëpitë tona, në qytetet tona, në fshatrat tona", theksoi Rama. Ai e konsideroi krejtësisht të realizueshme një ëndërr të tillë që e ka çdo shqiptar. "Kjo është thjesht ëndrra ime, është thjesht ëndrra e qindra-mijëra shqiptarëve dhe shqiptareve e qindra-mijëra të moshuarve, e qindra-mijëra prindërve, fëmijëve. Kjo nuk është një ëndërr e parealizueshme. Kjo është një ëndërr praktike dhe këtë ëndërr praktike ne do ta bëjmë fuqinë e fjalës dhe të veprimit tonë", u shpreh Rama. Për ta bërë realitet një gjë të tillë, kreu socialist kërkoi edhe njëherë një aleancë të re me qytetarët. "Prandaj thirrja ime e fundit e kësaj fjale është përtej të majtës dhe të djathtës së këtyre 17 vjetëve që na lanë kaq prapa, është Shqipëria, përtej të majtës dhe të djathtës së këtyre 17 vjetëve janë shqiptaret dhe shqiptarët, socialistë dhe demokratë të thjeshtë, që e vuajnë njësoj errësirën, papunësinë, korrupsionin, dhunën dhe mungesën e së ardhmes. Duke i ftuar qytetarët të bashkohen me Partinë Socialiste Rama e ka cilësuar atë si një instrument, ku çdo shqiptar mund të kontribuojë për të ardhmen e tij. Por Rama nuk e ka konsideruar partinë pronë të disave që janë në të. "Jo! Instrumenti ynë, Partia Socialiste e Shqipërisë nuk është ekskluzivviteti ynë, PSSH-ja nuk është pronë e atyre që janë brenda, por është pronë e të gjithë atyre që përmes saj duan të ndryshojnë jetën e tyre", u shpreh Rama në fjalën e tij në përshëndetje të 16-vjetorit të FRESSH-it.

Harrohet torta dhe fotot e rastit

Pas fjalës që kryetari socialist Edi Rama mbajti në festën e 16 vjetorit të FRESSH-it, gjithçka u mbyll nga ana ceremoniale dhe të rinjtë u drejtuan për në banketin e rastit. Por organizatorët kishin parashikuar dhe një ceremonial të vogël, atë të prerjes së tortës festive me nënshkrimin "Gëzuar 16 vjetorin e ditëlindjes së FRESSH-it" dhe fotot e rastit. Ceremoniali u "braktis" nga udhëheqja duke bërë që Megi të kërkojë me sy për disa minuta mos ndonjë nga drejtuesit e PS-së të ishin prezentë aty. Në fund Megi ka fikur qiriun e vendosur mbi tortë dhe e ka prerë atë me bashkëpunëtorët e saj, të cilët nuk e kishin parashikuar këtë detaj, duke menduar se të gjithë do të qëndronin në ceremonialin e zakonshëm për të ndarë ëmbëlsirën. Në festat e viteve më parë, torta është prerë në praninë e kryetarit socialist, sekretarit të përgjithshëm dhe sekretarëve të tjetër të PS-së. E paharrueshme ka mbetur një nga përvjetorët e FRESSH-it, kur ish-kryetari socialist, Fatos Nano pas prerjes së tortës, lugën e parë do t'ia jepte kryetarit të atëhershëm të forumit, Gjergj Koja.

Tahiri: Trokisni derë më derë për Partinë Socialiste

Drejtuesi i Fondacionit "Qemal Stafa", Sajmir Tahiri duke përshëndetur festën e eurosocialistëve, kërkoi nga të rinjtë që të trokasin derë më derë për të rritur dhe fuqizuar partinë socialiste. "Është detyra jonë të trokasim derë më derë, të harxhojmë pak kohë nga koha jonë duke folur me njëri-tjetrin, me shokët tanë, t’i bindim se Partia Socialiste nuk është e mbyllur por e hapur, është e tyrja po aq sa është jona, është e të rinjve po aq sa është e të rriturve, është e djemve po aq sa është e vajzave, akoma më thjeshtë, është e eurosocialistëve, është e të gjithëve", tha Tahiri. Sipas tij, çdo njeri duhet të shohë brenda vetes dhe të gjejë imagjinatën dhe pasionin për politikën.
"Imagjinatë sepse duhet vërtetë e tillë jo vetëm për të parë atë që vuan nga uria, nga varfëria dhe skamja, nga vetmia dhe braktisja e shtetit, nga ankthi për ditën e nesërme dhe tmerri për të ardhmen e zezë që po na ofrojnë, por duhet imagjinatë për ta vënë veten në vendin e atyre që po vuajnë për të kuptuar vërtet hallet e problemet e shqiptarëve, duhet imagjinatë për të gjetur dhe eksploruar rrugët më të mira drejt suksesit", tha Tahiri. Sipas tij, në politikë kërkohet edhe pasion pasi, "nuk mund të bësh dot politikë pa dashur vendin tënd, pa dashur prindërit, pa dashur shokët dhe miqtë, duhet pasion për t’i dhënë dorën e shpresës atij që sot po vuan".