Lëvizja MJAFT! i shprehu sot ngushëllimet më të thella familjarëve të viktimave në Gjirokastër, dhe kërkoi dorëheqjen e kryetarit të Bashkisë së Gjirokastrës z. Flamur Bime, insitucioni i të cilit dhe ai vetë janë përgjegjës për këtë tragjedi.
Ndërkohë, MJAFT! verifikoi në terren fakte që vërtetojnë njëanshmërinë e z. Bime si kryetar i Këshillit të Rregullimit të Territorit Gjirokastër, për firmat e ndërtimit, të cilat janë në pronësi të të afërmve të tij, dhe sidomos të kunatit të tij z.Zihni Isaraj.
“Ankesat e vazhdueshme të qytetarëve nuk janë marrë kurrë parasysh nga Bashkia dhe Z.Bime”, tha në një konferencë për shtyp Aldo Merkoci, aktivist i Lëvizjes MJAFT. “Zëri i anëtarëve të tjerë të KRRT-së që kundërshtojnë për objekte të cilat paraqesin rrezikshmëri nuk dëgjohet fare. Votat e tyre nuk përfillen pasi "dora" e z. Bime përbën shumicën absolute në KRRT”, shtoi ai.
Lëvizja MJAFT! kërkoi kontrollin e menjëhershëm të të gjitha objekteve si më poshtë, që paraqesin rrezikshmëri për jetët e banorëve në Gjirokastër, dhe për të cilat ka ankesa të vazhdueshme:
- Qendër tregtare dhe ambjente banimi - buzë rrugës nacionale Gjirokastër-Kakavijë te ish zona e Postbllokut me investitor "Boci SHPK", ku terreni është njësoj i rrëshkitshëm me terrenin në të cilin u rrëzua pallati 5 katësh dje. E gjithë kodra mbi të është e banuar.
- Lejet e ndërtimit të dhëna pa kriter buzë lumit Drino. Shtrati i këtij lumi herë pas here përmbyt zonën përreth.
- Hapja e nyjes së qarkullimit pranë spitalit rajonal jashtë cdo kriteri dhe kushti teknik ndërtimi, me ankesa të vazhdueshme nga qytetarët.
- Betonizimi i gjithë damarëve të sipërm të qytetit. Nga rrugët tradicionale me kalldrëm tani nuk ka më asnjë gjurmë.
- Ndërtimi i pallatit shumëkatësh pranë konviktit të djemve, pa zbatuar fare distancat dhe normat e lejuara, me investitor kunatin e Z.Bime, Z. Isaraj.

ZYRA E SHTYPIT E LEVIZJES MJAFT!