Rama-Braçes: Mos dil para mediave, se je konsumuar

Nga Luljeta Progni

Rama i heq të drejtën Braçes të dalë në konferencë shtypi, duke e vlerësuar si figurë të konsumuar për shkak të daljeve të përditshme të tij para mediave për çështje të ndryshme. Burime pranë PS thanë dje, se nënkryetari i grupit parlamentar të PS, Erion Braçe, ka reaguar mjaft ashpër ndaj urdhrit të kryetarit Rama gjatë një debati ndërmjet tyre. Burimet thanë dje se Rama i ka kërkuar Braçes që të mos shfaqet në media për një periudhë kohe ende të pacaktuar, duke argumentuar se dalja e Braçes përditë në konferenca shtypi bën që ky i fundit të vlerësohet si një figurë mjaft e konsumuar politikisht. Përveç kësaj, dalja e një individi të vetëm para mediave, përditë dhe për gjithçka ka krijuar idenë se kjo parti dhe grupi i saj parlamentar unifikohet vetëm me këtë figurë dhe në rastin konkret me figurën e Braçes, duke lënë në hije figura të tjera drejtuese të kësaj partie në grupin e saj parlamentar. Debati i Ramës me Braçen shënon edhe të parin debat të Ramës me mbështetësit e tij në PS, madje Braçe është mbështetësi kryesor i Ramës, qysh prej momentit kur ky i fundit shfaqi hapur ambicien për të fituar postin e kryetarit të PS, në vjeshtën e vitit 2005.

Debati

Braçe e ka pritur me reagime negative ndaj Ramës urdhrin e këtij të fundit, ndërsa rezultati i parë i këtij debati është mungesa e Braçes në aktivitetet kryesore që kryetari Rama ka zhvilluar javën e fundit. Majde, Braçe ka munguar edhe në mbledhjen e djeshme të kryesisë së PS, e zhvilluar në Libofshë të Fierit. Prej afro një jave, nënkryetari i grupit parlamentar të PS nuk është dukur në podiumin e sallës së konferencave në kryesinë e Kuvendit, për të deklaruar qëndrimin e PS për ndonjë çështje të caktuar. Në vend të Braçes kanë dhënë deklarata për çështje të caktuara deputetët Marko Bello, Musa Ulqini, Alfred Dalipi etj. Ndërsa dje foli në emër të PS para mediave kryetari i kësaj partie për Tiranën, Besnik Bare.
Qysh prej momentit kur Braçe u zgjodh nënkryetar i grupit parlamentar të PS, thuajse çdo ditë të javës ka qëndruar i pranishëm në media nëpërmjet konferencave të shtypit, në kryesinë e Kuvendit. Duke anashkaluar edhe kryetaren e grupit parlamentar të PS, Valentina Leskaj, Braçe nuk ka lënë asnjë ditë të kalojë pa u shfaqur në media, për të pasqyruar qëndrimin e PS për çështje të ndryshme. Duket se kjo dalje e përditshme e Braçes ka sjellë reagime të socialistëve në bazë, të cilët i kanë kërkuar Ramës shpjegime, përse vetëm Braçe flet në emër të PS dhe përse janë anashkaluar figura qendrore të kësaj partie, të cilat nuk kanë hapësirën e duhur në media për të dëshmuar qëndrimet e partisë. Nuk ka ende të dhëna të sakta sesa kohë Braçe do t`iu mungojë mediave me konferencat e tij të përditshme, por e vërtetë është se ai ka afro një javë që nuk është parë në podiumin e konferencave të shtypit në kryesinë e Kuvendit. Në vend të Braçes tani për tani po shfaqet më shpesh se zakonisht Marko Bello, Musa Ulqini e Alfred Dalipi.