Topi: Kosova e pavarur garanton stabilitet në rajon

Nga Ejona Bajrami

“Kosova mbetet çështja e fundit e shpërbërjes së një shteti të ndërtuar artificliasht”, - ka thënë gjatë fjalimit të tij presidenti, Bamir Topi, para Asamblesë Parlamentare të Këshillit të Europës. Në fjalën e tij presidenti Topi ka theksuar se Shqipëria është e bindur se, vetëm një Kosovë e pavarur dhe demokratike brenda kufijve të tanishëm është zgjidhja më e drejtë për paqe dhe stabilitet në rajon.
“Ne dënojmë çdo përpjekje për ndarje, që do të shërbente për ringjalljen e nacionalizmave në Ballkan. Shqipëria është e vendosur të respektojë plotësisht kufijtë ndërkombëtarë të fqinjëve, përfshirë edhe kufijtë e Kosovës”, - vijoi më tej presidenti, duke shtuar se nëpërmjet zgjedhjeve të fundit Kosova po ofron një realitet të ri gjeopolitik në rajonin tonë dhe një partneritet të besueshëm ndaj Bashkimit Europian dhe NATO-s.
Gjatë seancës së pyetje-përgjigjeve, presidenti Topi ka shkëmbyer replika me një delegat serb. Në pyetjen e zotit Ivica Dacic, se çfarë i konsideron kosovarët, pakicë kombëtare në Shqipëri apo vetëm shqiptarë, presidenti Topi sqaroi se ai me termin kosovar konsideron të gjithë qytetarët e Kosovës, përderisa Shqipëria dhe Kosova janë dy vende që rregullohen me institucionet e tyre, të cilat patjetër do kenë marrëdhënie të mira dhe një të ardhme euroatlanitike. Presidenti Topi përshkroi përpjekjet e Shqipërsië për integrim dhe vuri në pah rolin moderator të Shqipërisë dhe faktorit shqiptar në rajon, sidomos për zgjidhjen e çështjes së Kosovës, pavarësinë e pritshme, të shpejtë e të merituar të saj, duke patur si pikë referimi planin “Ahtisari”.