Bashkimi Evropian ka ulur euforinë e Shkupit zyrtar për integrimin e shpejtë në "klubin më të fuqishëm të kontinentit". Kryeministri i Maqedonisë, Nikolla Gruevski, ka marrë dje një goditje të fortë politike nga Brukseli zyrtar, e cila ka dalë nga goja e vetë komisionerit për Zgjerim, finlandezit, Olli Rehn.

Dhe pikërisht goditja e Bashkimit Evropian ndaj autoriteteve maqedonase ka ardhur aty ku nuk e pritnin, trajtimin ndaj shqiptarëve. Në një deklaratë për shtyp pas takimit me Kryeministrin Gruevski, komisioneri Rehn, deklaroi shkoqur se trajtimi ndaj shqiptarëve është një nga kushtet thelbësore të integrimit të Maqedonisë në BE. Dhe duke vijuar deklaratën e tij, komisioneri i Zgjerimit theksoi se Maqedonia duhet të përmirësojë legjislacionin për të drejtat e shqiptarëve, luftën ndaj krimit të organizuar dhe korrupsionit. Vetëm atëherë do të nisin bisedimin për anëtarësimin në Bashkimin Evropian. Në muajin mars do të zhvillohet raundi i ardhshëm i bisedimeve Bruksel-Shkup në kuadër të negociatave të anëtarësimit. Dhe në këtë kohë ka shumë mundësi që Bashkimi Evropian të propozojë disa kushte për fillimin e bisedimeve të anëtarësimit. Këtë e konfirmoi vetë komisioneri i BE-së për Zgjerimin. "Në qoftë se progresi pozitiv vazhdon, atëherë synimi im është të propozoj disa etapa që duhen përmbushur për nisjen e bisedimeve të anëtarësimit", tha komisioneri për zgjerimin e BE-së, Olli Rehn, pas takimit me Kryeministrin maqedonas, Nikolla Gruevski. Rehn tha se kushtet kryesisht do të kenë lidhje me reformat në administratë dhe sistemin gjyqësor dhe mundësia e paraqitjes së tyre është muaji mars, së bashku me propozime për vendet e tjera ballkanike në radhë për t‘u anëtarësuar në bllokun 27-anëtarësh. "Jam i sigurt që këto prioritete mund të realizohen. Brukseli këmbëngul për progres në zbatimin e ligjit, të drejtat e shqiptarëve dhe luftën kundër krimit të organizuar dhe korrupsionit, para se të nisin bisedimet".

Vizat

Kryeministri maqedonas, Nikolla Gruevski, e ka justifikuar vendosjen e regjimit të shtrënguar të vizave me Shqipërinë, me zbatimin e kushteve të BE-së. Fakt që është përgënjeshtruar fuqishëm nga ambasadori i Bashkimit Evropian në Shkup, Ervan Fuere, i cili ka deklaruar se qeverisë maqedonase nuk i është vënë kurrfarë detyrimi. Ndërkaq, vetë Kryeministri Gruevski tentoi të zbusë përplasjet me Tiranën, duke trajtuar problemin delikat të vizave. Gruevski në Bruksel, gjatë takimit me komisionierin për zgjerim të BE-së, Oli Rehn, tha se ligji për regjimin e vizave u miratua në maj të vitit 2006 nga qeveria e mëparshme, por hyn tani në fuqi. Qeveria e Maqedonisë do të përpiqet të gjejë një zgjidhje për çështjen e regjimit të vizave me Shqipërinë, zgjidhje që nuk do të shkelë direktivat e BE-së, por njëkohësisht do të lehtësojë lëvizjen e lirë për shtetasit e dy vendeve. Deklarata erdhi nga Kryeministri i Maqedonisë, Nikola Gruevski, gjatë takimit të tij me komisionierin për zgjerim të BE-së, Oli Rehn. I pyetur nëse ishte i gabuar vendimi për të vendosur një regjim vizash me Shqipërinë, në një kohë kur Maqedonia dhe vendet e rajonit kërkojnë që liberalizim të vizave me Bashkimin Evropian, shefi i kabinetit të Maqedonisë, tha se ligji për regjimin e vizave u miratua në maj të vitit 2006 nga qeveria e mëparshme, por hyn tani në fuqi.



Shqip