Meta sfidon “Dialog me Shqipërinë”, nis bashkëbisedim me elektoratin e majtë

Nga Luljeta Progni

Është parë qartë në media javët e fundit gara e krerëve të dy partive kryesore të opozitës, Rama e Meta, për të qenë protagonistë të së majtës në zhvillimet e fundit politike. Në procesin e bashkëpunimit me mazhorancën për reformën në drejtësi, prej afro dy javësh janë shfaqur platforma të ndryshme të dy partive, të paraqitura nga dy drejtuesit, Rama e Meta. Sapo Rama paraqiti një rezolutë bashkëpunimi për reformën në drejtësi, Meta nxitoi të propozojë një plan veprimi për këtë çështje, që u pasua nga një propozim i Ramës për një pakt kombëtar për reformën në drejtësi. Por duket se këtë garë e ka fituar kreu socialist, pasi rezoluta që ai propozoi për bashkëpunimin për reformën në drejtësi, u miratua në Kuvend nga të gjitha partitë politike. Nëse mund të thuhet se është përcaktuar “fituesi” i garës së protagonistit të partive të majta për reformën në drejtësi, gara për bashkëbisedimin me popullin sapo ka nisur. Tani për tani, gara është e qetë, por nisur nga përvoja, duke u afruar drejt zgjedhjeve parlamentare, pritet që gara të ashpërsohet, pasi shanset që PS dhe LSI të jenë të bashkuara në zgjedhjet e ardhshme duket se janë të pakta.


Meta sfidon “Dialog me Shqipërinë”


Kryetari i LSI, Ilir Meta, ka nisur bashkëbisedimin me kategori të caktuara, ku dhe është parashikuar të paraqiten projektligje konkrete për kategoritë, me të cilat do zhvillohen takimet. Një proces i gjatë bashkëbisedimi me të gjitha kategoritë e shoqërisë shqiptare pritet të vazhdojë përgjatë gjithë këtij viti, i ndarë në tri faza. Takimet me përfaqësues të moshës së tretë, të identifikuara më shumë si elektorat i PS, japin qartë idenë e një gare ndërmjet PS dhe LSI, për të fituar elektoratin e njëra-tjetrës. Kryetari i LSI, Ilir Meta, ka nisur prej disa ditësh një bashkëbisedim me përfaqësues të moshës së tretë, ku dhe po prezanton projektligjin e kësaj partie për kujdesin dhe trajtimin e kësaj kategorie. Paraqitja me projektligj konkret për moshën e tretë nga ana e Metës duket si një pikë e fortë e tij për të sfiduar “Dialog me Shqipërinë” të kryetarit të PS, Edi Rama, i cili në takimet e tij me socialistë në rrethe të ndryshme të vendit nuk ka projekte konkrete, por premtime për një politikë të re dhe lënien pas të politikës së vjetër. Sidoqoftë, kryetari i PS ka nisur prej disa muajsh “Dialogun me Shqipërinë” në të gjitha rrethet e vendit, ku dhe është takuar me kategori e grupmosha të ndryshme. Në takimet e tij, Rama ka shpalosur ambicien për të çrrënjosur politikën e vjetër në PS dhe për instalimin e një politike të re në këtë parti, e cila të jetë politikë në shërbim të qytetarëve. Në vend të projektligjeve që duket se do të vazhdojë të publikojë Meta në takime me elektoratin e majtë, Rama ka promovuar idenë e tryezave për çështje të ndryshme, të zhvilluara në të gjitha rrethet e vendit, siç ishin tryeza për arsimin, për mjedisin etj.
Projekti i Ramës “Dialog me Shqipërinë” është kritikuar nga analistë apo partiakë, por në forumet drejtuese të kësaj partie, në analizat e deritanishme, procesi “Dialog me Shqipërinë” është cilësuar i suksesshëm.


Strategjia e Metës për bashkëbisedimin me elektoratin e majtë


Mosha e tretë njihet më së shumti si pjesë e konsiderueshme e elektoratit të PS dhe nisja e bashkëbisedimit pikërisht me këtë kategori, duket se përbën edhe synimin e qartë të LSI, për t’i marrë PS këtë pjesë të konsiderueshme të elektoratit. Në takimet e bashkëbisedimit me përfaqësues të moshës së tretë, Meta shoqërohej veç të tjerëve edhe nga kryetari i sindikatës së pensionistëve, Isa Gorica. Burime pranë LSI thanë dje, se ekspertë të kësaj partie janë duke përgatitur një sërë projektligjesh që lidhen me grupmosha e kategori të caktuara, të cilat do të publikohen në takimet e Metës në procesin e bashkëbisedimit me elektoratin e majtë në të gjithë vendin. Duke u bazuar te programi i kësaj partie, projekligjet që po hartohen nga ekspertët, synojnë afrimin e sa më shumë kategorive me LSI, në prag të zgjedhjeve parlamentare të vitit 2009.


Projektligji i LSI


Lëvizja Socialiste për Integrim ka nisur bashkëbisedimin me përfaqësues të moshës së tretë, për paraqitjen dhe konsultimin e projektligjit “Për kujdesin ndaj individëve të moshës së tretë”. Kryetari i LSI, Ilir Meta, ishte dje në Korçë, ku zhvilloi një takim të zgjeruar me përfaqësues të moshës së tretë në këtë qytet. “Jemi sot këtu në vijim të përpjekjes sonë për të promovuar një p/ligj të ri “Për kujdesin ndaj individëve të moshës së tretë. Ky është një p/ligj, që ne e kemi hartuar në bashkëpunim me sindikatën e pensionistëve, në bashkëpunim me profesorë dhe ekspertë të çështjeve sociale dhe problemeve të moshimit. Ne mendojmë se jo vetëm që është një p/ligj i domosdoshëm, por është një p/ligj i vonuar, për arsye se problemet e moshimit po bëhen gjithnjë e më të mëdha, gjithnjë dhe më të mprehta në vendin tonë. Kjo iniciativë e LSI është produkt i një reflektimi të gjatë dhe të vazhdueshëm mbi gjendjen e të moshuarve dhe të shtresave në nevojë në vend, por në të njëjtën kohë, është shprehje e angazhimit të forcës politike që përfaqëson LSI, për t`u shkëputur nga e kaluara dhe për t'i hapur rrugë politikave sociale afatgjata, përpjestimisht me shkallën e zhvillimit ekonomik të vendit”.
Duke shprehur dëshirën e mirë për miratimin e këtij p/ligji, Meta i bëri thirrje klasës politike në vend që të mbështesin këtë p/ligj, më qëllim miratimin e tij. “Aktualisht, në Shqipëri, nuk ekziston asnjë strukturë e vetme, qoftë edhe modeste, që ndihmon të moshuarit dhe lehtëson vuajtjet e tyre. Sistemi aktual i përkrahjes sociale konsideron përciptazi vetëm personat më fatkeqë (kryesisht të braktisur), duke lënë jashtë vëmendjes plotësisht të moshuarit e tjerë, të cilët gjithashtu kanë nevojë për kujdesin e shtetit, e para se gjithash kërkojnë që të vazhdojnë të kontribuojnë, sipas mundësive, për zhvillimin e shoqërisë”, - tha Meta.