Lëvizja e Nanos përfundon në Partinë e Metës


Nga Ilir DAKO - Të zhgënjyer dhe të demoralizuar nga braktisja e Fatos Nanos në luftën kundër Edi Ramës, një grup deputetësh dhe militantësh kanë kthyer sytë nga LSI e Ilir Metës. Tashmë të mbetur në një udhëkryq politik , shumica tyre kanë menduar t’i bashkohen partisë së Ilir Metës, për arsye se në forcën e tyre politike për të cilën kanë kontribuar për gati 17 vjet nuk gjejnë më hapësirat e nevojshme, të cilat janë ngushtuar nga agresiviteti dhe neodiktatura që ka instaluar Edi Rama në këtë parti. Të sigurt që Edi Rama nuk ka për t’i propozuar më për deputetë,por as ka për ti angazhuar më në lëvizjen e tij politike, të zhgënjyer nga Fatos Nano i cili i braktisi në momentet kur kësaj lëvizje ju bashkuan shumë militantë dhe eksponentë të PS, këta të fundit shprehen se nuk mund të hedhin në koshin plehrave kontributin e tyre politik dhjetravjeçar për kapriçiot e Fatos Nanos apo dhe të dembelizmit të tij tradicional. Duke qenë se lëvizja e tyre politike u sabotua në mënyrë të pakuptimtë nga Fatos Nano, iniciatorët e kësaj lëvizje nuk shikojnë tjetër mundësi zgjidhje veç largimit të tyre drejt LSI. Shenjën e parë për largim nga PS drejt LSI e ka dhënë një grup militantësh socialistë të rrethit të Beratit, të cilët ndihen të diskriminuar nga politika që ndjek kryetari i PS. E njëjta situatë shoqërohet në shumë rrethe të vendit ku shumë socialistë “ de facto” janë bërë gati të largohen nga strukturat e PS për tu bashkuar me LSI. Ndërkohë që baza ka këtë disponibilitet, në qendrën e lëvizjes kundër Ramës situata është më kaotike. Gjashtë deputetët që votuan për zgjedhjen e Bamir Topit si president i Republikës janë në mëshirë të fatit dhe ndihen të përbuzur për këtë veprim nga elektorati socialist, i cili e mori si shenjë tradhtie veprimin e tyre. Tashmë këta të fundit nuk dinë se si do të jetë fati i tyre në politikë. Nëse Taulant Dedja është larguar në Kanada në shenjë pakënaqësie ndaj Nanos, të tjerët e shikojnë veten larg strukturave partiake dhe akoma më larg nga Fatos Nano, i cili nuk ju hap as telefonin. Ndërkohë pjesa tjetër e grupimit është në një kaos total. Një pjesë e njerëzve të cilët silleshin rreth Fatos Nanos është shkëputur në drejtim të Ramës duke ju servilosur këtij të fundit. Ndërkohë pjesa tjetër shikon si mundësi të vetme atashimin me një forcë politike të përafërt me socialistët siç është dhe LSI, e cila është strukturuar me një pjesë të militantëve të zhgënjyer nga qeverisja e Fatos Nanos. Burime të sigurta brenda konfirmojnë se ata janë duke angazhuar njerëzit e pakënaqur rreth tyre me qëllim për të krijuar një frakturë të re brenda PS. Shumë eksponentë dhe militantë socialistë nga zonat e ndryshme të Shqipërisë duke filluar nga Shkodra,Korça, Elbasani, Devolli, Fieri, Berati, etj, të cilët u ekspozuan hapur në turin e Nanos kundër Ramës, tashmë janë në dilemën e largimit përfundimtar nga PS, për arsye se qëndrimi i tyre i mëtejshëm është vdekje klinike. Shumë prej tyre e kanë të qartë që Edi Rama nuk i zgjedh më në krye të strukturave por as nuk i angazhon në administratën publike në zgjedhjet e reja. Humbja e këtij atributi për këta persona do të thotë humbje vendesh pune e për rrjedhojë humbjen e bukës së gojës. Pra situata ku ndodhet grupi i deputetëve dhe i mbështetësve të Nanos është katastrofale përsa i përket vazhdimësisë të aktivitetit të tyre në PS. Kalimi në partinë e Ilir Metës mesa duket do të jetë trampolina e ardhshme për të vazhduar karrierën e tyre politike.
Lëvizja Nano
Nisi me Petro Koçin si Lëvizja për Politikë Institucionale dhe u vazhdua nga Fatos Nano në momentin e humbjes së betejës për postin e presidentit. E filloi me idenë e rrëzimit të Ramës duke imituar stilin e fushatës për katarsis të vitit 2001dhe e përfundoi duke shitur kokën e Petro Koçit te Edi Rama, me braktisjen takimin të Fierit. Megjithëse Rama ju kundërpërgjigj se nuk ka kompromis me të, Fatos Nano e braktisi lëvizjen në ditën e takimit me përkrahësit fierakë të lëvizjes antirama. Nga ajo ditë Nano vazhdoi turin e tij të pushimeve nëpër kazinotë evropiane dhe në ishujt ekzotikë ndërkohë që lëvizja e tij kundër Ramës u tret si sheqeri në ujë. Socialistët e Tiranës, Shkodrës, Durrësit, Elbasanit, Korçës të cilët e përkrahën në lëvizjen e tij tashmë ndihen të zhgënjyer nga humbja e imazhit të liderit të tyre që kishte vendosur të spastronte partinë nga pushtimi i radikalit Rama. Tashmë ata janë më të zhgënjyerit dhe më të humburit në këtë histori. Aktivizimi i tyre me Fatos Nanon ju mbylli përfundimisht dyert e partisë dhe i hodhi në mes të “katër rrugëve”.