Qender prostitucioni te blloku i ambasadave


Një bazë prostitucioni është goditur në Tiranë pas një operacioni të ndërmarrë nga Antitrafiku, ndërkohë që në prangat e policisë kanë përfunduar pronari i një hoteli dhe një prostitutë. Baza ishte vendosur pranë bllokut të ambasadave, te hotel “Drilon”, i cili është sekuestruar përkohësisht nga Prokuroria e Tiranës për veprime hetimore. Policia e Tiranës tha zyrtarisht se në pranga përfunduan Sofie A. dhe Sulejman Shehu. Gjithashtu, policia shoqëroi edhe tetë femra të tjera, të cilat dyshohen se kryenin aktivitet prostitucioni në këtë hotel. Burimet policore të kryeqytetit bënë të ditur se operacioni i ndërmarrë u kodua me emrin “Drilon”, ashtu siç quhej edhe hoteli, për të cilin ishte marrë informacion operativ se ishte bazë prostitucioni. Disa javë më parë, agjentët e Antitrafikut të Tiranës ishin informuar se në zonën e bllokut të ambasadave ishte një hotel, në të cilin ushtrohej prostitucion. Menjëherë ka nisur hetimi për dokumentimin e kësaj vepre penale, ndërsa dy ditë më parë është bërë goditja. Sipas policisë, nga seksioni kundër trafiqeve të paligjshme, në orën 14:00 të së martës, ndërhynë në këtë hotel duke realizuar arrestimin në flagrancë të Sofie A., 40 vjeçe, lindur në Shkodër dhe banuese në Shkozë. Sipas policisë, ajo është kapur gjatë kontrollit të ushtruar në hotel. Nga të dhënat e grupit hetimor mësohet se ajo është kapur në flagrancë duke ushtruar prostitucion në një nga dhomat e hotelit me shtetasit A. Z. dhe H. H. Policia detajoi se ajo kryente këtë aktivitet kundrejt shumës prej 2 mijë lekë për person. Ndërkohë, kontrolli është ushtruar edhe në dhomat e tjera të hotelit, ku janë gjetur tetë femra të tjera, bashkë me partnerë. Ata janë marrë në pyetje nga oficerët e policisë gjyqësore dhe më pas janë lënë të lirë. Megjithatë, policia tha se dyshon se këto tetë femra ushtronin prostitucion në ambientet e këtij hoteli. Duke marrë shkas nga këto të dhëna, uniformat blu të Antitrafikut kanë bërë shoqërimin në polici të Sulejman Shehut, 48 vjeç, lindur në Kukës dhe banues në Tiranë, i cili është posedues i hotelit “Drilon”. Por, gjatë provave të mbledhura, është vendosur që ai të arrestohet. Sipas policisë, arrestimi i tij u bë pasi për të është regjistruar procedim penal për veprën penale të “mbajtjes së lokaleve për prostitucion”. Ai dyshohet se në kohë dhe periudha të ndryshme ka proceduar raste të ushtrimit të prostitucionit në këtë hotel, ku dhe u bë arrestimi i shtetases së lartpërmendur. Megjithatë, të dy të arrestuarit nuk e kanë pranuar akuzën e ngritur nga policia. Ata janë shprehur se nuk kishin lidhje njëri me tjetrin dhe se nuk kishin ushtruar aktivitet kriminal. Por, kjo nuk e ka bindur prokurorinë përballë fakteve të tjera, e cila ka vendosur edhe sekuestrimin e përkohshëm të hotelit. Sipas të dhënave hetimore, po vlerësohet nëse ka prova të forta, nëse hoteli është përdorur vetëm për këtë aktivitet dhe mund të kërkohet në gjykatë që ai të sekuestrohet përfundimisht. Policia tha se në cilësinë e provës materiale u sekuestruan edhe 30 mijë lekë, që dyshohet se janë përfituar vetëm gjatë një dite nga kjo veprimtari e paligjshme. Sipas të dhënave hetimore, Sofie A. dërgonte në hotel mesatarisht 15 klientë në një ditë. Ndaj saj është ngritur akuza e ushtrimit të prostitucionit, ndërsa pronari i hotelit akuzohet për vënien në përdorim të ambienteve për prostitucion.

Burimi: Gazeta Shqip