Ish-Ministri i Mbrojtjes akuzon prokurorinë që nuk heton pistën e minave në shpërthimin e 15 marsit
Në televizionin ALSAT, Fatmir Mediu tregon dyshimet mbi hetimin
Përherë herë të parë, ish-ministri i Mbrojtjes, Fatmir Mediu rrëfen publikisht dyshimet e veta mbi punën e prokurorisë në hetimin e çështjes së Gërdecit. Në cilësinë e personit nën hetim, ish-ministri ka treguar edhe njëherë për një material konfidencial të kryepolicit të vendit, në të cilin thuhet se në Gërdec ditën e shpërthimit në fabrikë dyshohet se ka pasur edhe dy mina me sahat.
Referuar një pretendimi të tillë, të kahershëm në të vërtetë mësohet se dyshimet shkojnë deri atje sa është përcaktuar edhe mjeti në që ka mbartur dy minat dhe se sërish mendohet që shpërthimi të ketë ardhur nga jashtë. Fatmir Mediu, sot emri i përzgjedhur për në qeverinë e re, ka lëshuar një akuzë të drejtpërdrejtë ndaj numrit një të hetimit në vend, duke treguar se në të vërtetë Prokuroria e ka gjithë dokumentacionin e nevojshëm për të hetuar, por vazhdon të hetojë dhe të punojë vetëm me përgjysmimet e tyre.
Minat me sahat dhe anonimati i emrave...
Dikur u tha se, një letër anonime që hedh dritë mbi ngjarjen e mesditës së 15 marsit ka mbërritur në zyrën e numrit një të dikasterit të brendshëm, Bujar Nishani. Më pas, në formën e një shkresë, ndonëse konfidenciale, materiali i letrës është dorëzuar prej kryepolicit të vendit në Prokurorinë e Përgjithshme, me emër dhe firmë të tij. U tha se Drejtori i Policisë së Shtetit, Ahmet Prençi e dorëzoi këtë dokument për të ndihmuar prokurorinë në punën e saj hetimore dhe zbuluese për ngjarjen.
Në letër, përmbajtja e së cilës realisht është mësuar muaj më vonë, bëhet me dije se gjenden inicialet e emrave të dy personave, E dhe A.K, që sipas dërguesit janë vëllai dhe djali i N.K dhe se menjëherë pas shpërthimit saktësohej në letër se njëri është nisur për në Elbasan dhe tjetri për në Shkodër. Sërish ka qenë dërguesi i këtij informacioni që jo më shumë se 10 ditë pas tragjedisë, ku humbën jetën 26 persona dhe u plagosen rreth 300 të tjerë, i ka kërkuar ministrit të brendshëm që të hetohen tabulatet telefonike të këtyre dy personave për të mësuar të vërtetën në lidhje me lëvizjet e tyre me 14 dhe 15 mars të 2008-ës.
Minat dhe versioni i shpërthimit...
Grupet që kanë hetuar mbi shkaqet e tragjedisë së 15 marsit në Gërdec, si shkak kryesor kanë depozituar faktin se shpërthimi ka ardhur nga nxehtësia e karrocës së ngarkuar me municion. Në të vërtetë ky është pranuar edhe si versioni i ekspertëve xhenio, por që deri më sot edhe pse nën hetim janë plot 29 persona të pandehur, ende nuk ka asnjë version të saktë për shpërthimin, pasi personat që mund të dinin të vërtetën, fatkeqësisht mbetën brenda në fabrikë, pa pasur fatin të dilnin të gjallë jashtë saj.
Mirëpo depozitimi i letrës, ndonëse anonime, në zyrën e Nishanit ka hedhur edhe dyshimet mbi vendosjen në fabrikën e demontimit të municioneve të dy minave me sahat. Historitë kriminale që për armë kanë pasur pikërisht minat me sahat apo të telekomanduarat, në të vërtetë asnjëherë nuk kanë gjetur përgjigje nga hetimi dhe as zbulimi. Viktimat e kësaj arme janë të shumtë, jashtë ngjarjes së rëndë të 15 Marsit, ndërsa prokuroria dhe asnjë shërbim tjetër në të vërtetë nuk foli kurrë për një pistë të mundshme hetimi që do të fokusohej në shpërthimin me anë të minave, që sipas “anonimatit” kanë qenë të vendosura në një karrocë.
Shpjegimi i Fatmir Mediut për ALSAT
“Ç’mund të them unë për Prokurorinë e Përgjithshme që nuk vlerëson një material konfidencial i ardhur nga Drejtori i Përgjithshëm i Policisë që thotë se janë vendosur 2 mina me sahat në Gërdec; një material që mund të qëndrojë edhe të mos qëndrojë, por që në fund është një material bazë i cili duhet t’i bëjë njerëzit të gjykojnë realisht për atë që nuk është interesi i Fatmir Mediut, por interesi i sigurisë së këtij vendi. Pra dokumenti ekziston dhe këta njerëz i kanë të gjitha dokumentet, por nxjerrin vetëm gjysma të vërtetash, nxjerrin vetëm gjysma dokumentesh për të ndërtuar akuzën politike, prandaj them edhe një herë se qëndrimi i tyre është politik”.
Tirana Observer