Bashkëprodhimi shqiptaro-serb korr suksesin e radhës në Francë

Filmi “Honeymoons” (Muajt e mjaltit), që shënon edhe bashkëpunimin e parë kinematografik mes Shqipërisë dhe Serbisë është vlerësuar me Çmimin e Jurisë në Festivalin e ri të filmit Europian në Les Arcs, Francë. Ky vlerësim vjen pas disa sukseseve që ai pati në disa festivale të tjera europiane, ku mes emrave të njohur të kinematografisë botërore filmi me regji të Goran Paskaljevic dhe bashkëskenarist Genc Përmetin ka marrë edhe këtë çmim.

Goran Paskaljevic, u nderua me çmimin e karrierës në Festivalin Ndërkombëtar të Filmit në Selanik. Pas “Olympia Theatre” të Selanikut, më 19 nëntor “Muajt e mjaltit”, fituesi i çmimit “Golden Spike” në Valladolid të Spanjës, gjithashtu pas prezencës ndërkombëtare në Festivalin e Venecias dhe Torontos u shfaq si premiera e parë në Tiranë. Filmi duket se ia ka arritur qëllimit të tij për të përcjellë tek publiku mesazhin njerëzor të bashkëjetesës mes dy popujve, të cilët aspirojnë një të ardhme më të mirë në Evropë. Puna që ka bërë regjisori Goran Paskaljevic së bashku me bashkëskenaristin Genc Përmeti ka marrë vlerësimet maksimale dhe nga emra që sot janë cilësuar si ikona të filmit dhe teatrit shqiptar. Regjisorë, dramaturgë dhe aktorë të njohur pohojnë se filmi u prezantua me sukses. Emra të njohur si Pirro Milkani, Margarita Xhepa, Robert Budina, Rajmonda Bulku, Stefan Çapaliku etj, janë shprehur se filmi ishte një realizim i arrirë, por dhe me një mesazh shumë domethënës në ditët e sotme. Filmi, i cili ka si bashkëskenarist Genc Përmetin, në rolet kryesore interpretojnë: Nebojsa Milovanovic (Marko) Jelena Trkulja (Vera) Jozef Shiroka (Niku) Mirela Naska (Majlinda) Bujar Lako (Rroku) Yllka Mujo (Vevo), Lazar Ristovski aktori i parë me shpesh në filmat e Paskaljevicit. Të tjerë aktorë shqiptarë që luajnë janë Rozeta Feri, Kristaq Skrami, Timo Flloko, Çun Lajçi, Myzafer Zifla, Genti Kame, etj. Në TIFF ’09 Çmimi i Mirënjohjes i shkoi sërish regjisorit Goran Paskaljevic. Ndërkohë nga viti 1971 deri tani ai ka bërë 30 filma të shkurtër/dokumentarë dhe 15 filma të gjatë, shumë prej të cilëve janë shfaqur dhe vlerësuar nga festivalet më prestigjioze ndërkombëtare të filmit. Rritja e nacionalizmit në Jugosllavi e detyroi atë të linte vendin në vitin 1992. Më 1998 ai u kthye për të xhiruar "Fuçi baruti" (Kabare e Ballkanit)- The Poëder Keg (Cabaret Balkan), por kriticizmi i tij konstant ndaj regjimit të Millosheviçit u përball me sulme të dhunshme dhe kërcënuese në shtypin zyrtar. Kështu, ai vendosi edhe një tjetër herë të linte vendlindjen në kërkim të një vendi ku të mund të realizonte filmin e tij, "Si u bë Herri një pemë"-How Harry Became a Tree. Ai gjeti Irlandën. Ai u kthye në Beograd pas përmbysjes së regjimit të Millosheviçit. Atje ai xhiroi dy filma: “Ëndrra e një nate dimri” -Midëinter Night’s Dream dhe “Optimisti”-The Optimists. Më 2001, the International Film Guide (Variety) e rreshton atë si një prej pesë regjisorëve më të mirë të vitit (së bashku me Lasse Hallström, Neil Jordan, Steven Soderbergh dhe Edward Yang). Në janar të vitit 2008, Muzeu i Artit Modern në New Jork (MoMA) shfaqi një retrospektivë të plotë të punës së tij. Filmi i tij më i ri "Muajt e mjaltit"-(Honeymoons) përfundoi në qershor të këtij viti.

Historia në “Muajt e mjaltit”
Ngjarja fillon në Shqipërinë dhe Serbinë e ditëve tona. Ne ndjekim fatet e dy çifteve që kanë vendosur të lënë vendlindjet e tyre në kërkim të një jete më të mirë në Evropën Perëndimore. Pas gjithfarë lloj incidentesh, kur çifti shqiptar mbërrin në një port të jugut të Italisë, nisin edhe problemet e tyre. I njëjti fat pret edhe çiftin serb që udhëton me tren për në Bashkimin Evropian në kufirin hungarez. Edhe pse dy palët nuk i lidh asgjë me një incident të ndodhur në Kosovë ku humbën jetën dy ushtarë Italianë të OKB, ata arrestohen në kufi dhe dyshohen për shkak të disa rrethanave të pafat. Kjo i pengon të dy çiftet, ndoshta përkohësisht, të arrijnë ëndrrën e tyre, siç është shpesh rasti i të rinjve në Ballkan që paguajnë për gabimet e brezave të shkuar. "Muajt e mjaltit " është i pari bashkëprodhim mes Shqipërisë dhe Serbisë.

Nga Julia Vrapi



sot