Delavekouras: Qeveria nën diktatin e nacionalistëve, nuk pranon ekzistencën e minoriteteve

Athina zyrtare ka akuzuar dhe kërcënuar dje Republikën e Shqipërisë, duke ndërhyrë në mënyrë të paprecedentë në punët e brendshme të vendit tonë. Duke dhunuar hapur integritetin dhe sovranitetin e Shqipërisë, Greqia kërkon të diktojë modelin e certifikatave tona, thua se Shqipëria nuk është një vend i pavarur, por është një lagje e Selanikut. E gjendur në prag të luftës civile, Greqia kërkon krizën

e saj të brendshme ta zhvendosë në Shqipëri, duke hapur debate të paqena, me alibinë e mbrojtjes së minoriteteve. Athina zyrtare ka hedhur dje akuzua të ashpra ndaj qeverisë shqiptare, pas heqjes së elementit të kombësisë nga certifikatat. Sipas Athinës zyrtare heqja e kombësisë nga certifikatat e lëshuara në Shqipëri është një vendim, i cili ka ngritur shumë pikëpyetje rreth motiveve të saj. Deklarata erdhi nga zëdhënësi i Ministrisë së Jashtme greke, Grigoris Delavekouras, i cili gjatë një konference për shtyp, ka shprehur shqetësim për heqjen e kombësisë nga certifikatat. Ai nënvizoi se një vendim i tillë ndryshonte praktikën e dekadave me radhë si dhe nxori në dukje vonesat e procesit të regjistrimit të popullsisë në Shqipëri për shkak të presionit të disa qarqeve nacionaliste të cilët kundërshtojnë përfshirjen e pyetjeve mbi kombësinë, origjinën, gjuhën dhe fenë. Duke u kombinuar këto dy zhvillime sipas zëdhënësit të Ministrisë së Jashtme greke, të jepet përshtypja se vendimet e qeverisë Shqiptare po bien dalë nga dalë në diktatin e elementeve nacioaniliste ekstremiste të cilët nuk pranojnë ekzistencën e minoriteteve etnike në vendin fqinj dhe në mënyrë sistematike minojnë marrëdhëniet dypalëshe mes Shqipërisë dhe Greqisë. Reagimi i zëdhënësit të Ministrisë së Jashtme Greke Grigoris Delavekouras, erdhi disa ditë pas reagimit të organizatës së minoritetit grek, OMONIA. Në një deklaratë për shtyp, heqja e elementit të kombësisë vlerësohet si “shkelje brutale e të drejtave të njeriut” dhe kërkohet korrigjimi i menjëhershëm. Me një gjuhë të ashpër, veprimi është cilësuar “gjenocid statistikor”. “Janë të shumta pikat e dobëta dhe tendencioziteti në çështjen që lidhet me procedurën dhe formatin e ri të lëshimit të certifikatave nga gjendja civile. Bashkimi Demokratik i Minoritetit Entik Grek “OMONIA”, pasi e shqyrtoi çështjen, e denoncon publikisht, përderisa kjo është tejet ligjore dhe e mbështetur në Kushtetutën e Shqipërisë, në ligjshmërinë e brendshme, atë evropiane dhe botërore dhe kërkon me këmbëngulje që shteti shqiptar ta korrigjojë në mënyrë të menjëhershme. Edhe njëherë tjetër, theksojmë se nuk është e mundur që të tolerojmë dinakëri anadollake të kësaj natyre, me të cilat burokracia dhe klasa politike tentojnë gjenocidin “statistikor” të Minoritetit Entik Grek në tokat e tij amtare”, thuhej në deklaratë.


Aleanca Kuq e Zi: OMONIA, shantazhon

Aleanca Kuq e Zi e ka quajtur shantazh polik, reagimin e Omonias për mospranimin e certifikatave të reja në të cilat suprimohet kombësia. Në deklaratën e Aleancës Kuq e Zi thuhet se certifikatat në formatin e ri janë të njëjtat si në Evropë, duke shtuar se shteti nuk duhet të lejojë që t’i cenohet sovraniteti, "OMONIA të mos kërcënojë shtetin, kërkesat e bëra janë të pabazuara në ligj. Certifikata e re nuk është genocid, genocid do të ishte falsifikimi i kombësisë që synojnë ata. Këto certifikata janë të njëjta me të Evropës dhe në to nuk ka asgjë të paligjshme. Shteti duhet të reagojë dhe të mos lejojë të cenohet integriteti, pasi Shqipëria është një vend sovran", deklaruan përfaqësues të AK.

OMONIA, akuza qeverisë

Organizata e minoritetit grek, OMONIA ka deklaruar se ky akt pa asnjë paralajmërim i qeverisë shqiptare, për të ndryshuar formatin dhe përmbajtjen e certifikatës së lindjes dhe që të mos referohet më elementi i kombësisë, përveçse krijon probleme të shumta të karakterit teknik dhe burokratik, konfirmon me fakte se kush janë mentalitetet që zotërojnë në aparatin shtetëror edhe përsa i përket çështjes së regjistrimit të popullsisë. “Kërkojmë anulimin e menjëhershëm të procedurës dhe do të ndërmarrim të gjitha hapat dhe mjetet ligjore në mënyrë që ky akt edhe të denoncohet, edhe të rregullohet procedura e lëshimit të certifikatave të lindjes. Elementi i kombësisë përbën një argument themelor për theksimin e veçorive të një minoriteti dhe për ne përbën një të drejtë të dhënë. Nuk është e mundur që ndërsa presim avancimin e një sërë çështjesh dhe problematikash të tjera që lidhen me të drejtat e Minoritetit Etnik Grek në trojet e tij amtare, të kemi prapakthime të tjera të rrezikshme”, thuhet ndër të tjera në deklaratë.

Athina kërcënoi edhe për regjistrimin e popullsisë

Ndërkohë që pala shqiptare priste një reflektim pas deklaratave përçarëse dhe denigruese të konsullit grek Theodhoros Ikonomus, Athina zyrtare jo vetëm që nuk është distancuar nga këto qëndrime anti-shqiptare, por ka kushtëzuar Integrimin e Shqipërisë në Bashkimin e Evropian me njohjen dhe respektimin e të gjitha të drejtave të minoritetit grek në Shqipëri. Athina zyrtare ka theksuar se respektimit i minoritetit grek nëpërmjet regjistrimit të popullsisë siç dëshiron konsulli grek, do të jetë vendimtare për integrimin e Shqipërisë në BE. Me pak fjalë, në këmbim të mbështetjes në rrugën e integrimit, Greqia i kërkon Shqipërisë që të njohë Korçën si një vend minoritar grek, ashtu siç edhe u shpreh konsulli grek. “Ne ndjekim në shtypin shqiptar një diskutim mjaft të gjatë në lidhje me disa deklarata. Nuk dua që të kemi keqkuptime dhe do të jem shumë i qartë për pozicionin e Greqisë rreth kësaj çështjeje. Mund të ju them se ne e konsiderojnë minoritetin etnik grek në Shqipëri si një urë bashkëpunimi dhe miqësie midis dy vendeve dhe dy popujve tanë. Përmbushja e plotë e të drejtave dhe detyrimeve nga ana e Shqipërisë mbetet një barometër në marrëdhëniet tona dypalëshe por edhe një test për të ardhmen evropiane të vendit tuaj”, tha zëdhënësi i Ministrisë së Jashtme Greke.

leanca Kuq e Zi mbledh firma në Elbasan

Aleanca Kuq e Zi në vijim të turit të saj, është ndalur në Universitetin e Elbasanit “Aleksandër Xhuvani” ku me qindra studentë kanë firmosur peticionin kundër procesit të regjistrimit të popullsisë mbi baza etnike dhe fetare.“Ashtu si në të gjithë qytetet dhe universitetet e Shqipërisë, sot jemi në universitetin e Elbasanit ku ka vijuar firmosja e peticionit kundër procesit të regjistrimit të popullsisë mbi baza etnike dhe fetare”, deklaroi përfaqësuesi i Aleancës Kuq e Zi Emiliano Bitra. Ai tha se, jemi shumë të kënaqur për vullnetin që shprehin studentët, të cilët e kanë firmosur këtë peticion, si dhe për anëtarësimet e reja ku shumë qytetarë e ndjejnë këtë kauzë. Sipas përfaqësuesve të Aleancës Kuq e Zi, ky tur do të vijojë në të gjithë vendin në vazhdim të nismës së mbledhjes së firmave të peticionit në çdo qytet të vendit.




Adriatik Doçi



SOT