Berisha në kryesi: Po u bënë 94 vota, jam dakord për zgjedhjen e presidentit nga populli

Nga Armand Maho

Kryeministri, Sali Berisha, ka mbledhur dje, pa paralajmëruar kryesinë e Partisë Demokratike, gjatë së cilës i ka njohur anëtarët e saj me vendimin për ndryshimet në Kushtetutën e vendit. Gjatë mbledhjes, Berisha mësohet t’i ketë informuar anëtarët e saj mbi ndryshimet që janë propozuar në Kushtetutën e vendit. Në mbledhjen e kryesisë Berisha ka folur në lidhje me reformën në sistemin zgjedhor, si dhe nenin që ka të bëjë me zgjedhjen e presidentit. Burime nga mbledhja e PD thanë për gazetën “TemA”, se mbledhja e kryesisë ka kaluar pa debat, ndërkohë që në lidhje me mundësinë e zgjedhjes së presidentit nga populli, është mësuar se Berisha do të mbështesë çdo iniciativë, e cila do të arrijë të sigurojë 94 vota. Megjithatë, anëtarët e kryesisë, Edmond Spaho dhe Aldo Bumçi, kanë qenë të mendimit se më e mira është që presidenti të zgjidhet nga populli.


Deklarata


Menjëherë pas mbledhjes së kryesisë, kryeministri Berisha u shpreh se neni i krizës presidenciale duhet shmangur dhe ka përsëritur dhe njëherë gatishmërinë e tij për të votuar zgjedhjen e presidentit nga populli. Sipas tij, e rëndësishme është që hë për hë të shmanget neni 84, që ai e konsideroi si neni i krizës. Nga ana tjetër, kryeministri është shprehur dhe në lidhje me deklaratat e presidentit, të cilat i konsideroi si diversitet normal mendimesh “Diversiteti i mendimeve është një kosntante normale. Ky është një proces i hapur që po ecën me konsensusin më të gjerë të mundshëm, kaq mund të them. Nuk ka diskutim që PD dhe Sali Berisha kanë qenë për zgjedhjen e presidentit nga populli, sikundër PD dhe Sali Berisha, kur kanë shkruar kushtetutat, i kanë shkruar për zgjedhje nga parlamenti. Unë jam për atë që në rast se bëhen 94 vota, jam i pari që do të votoj për zgjedhjen e presidentit nga populli, por neni i krizës i 84 votave që nuk e ka Gjermania, nuk e ka Çekosllovakia, nuk e ka shumica e vendeve të botës, ai nen nuk ka pse t’i qëndrojë si shpatë Demokleu vendit”, - tha kryeministri. Në lidhje me aleatët dhe me dështimin e tryezës një ditë më parë, kryeministri u shpreh i bindur se do të mundëshet arritja e një marrëveshjeje me ta. Ju e dini që unë kam një gjerësi të pafundme në diskutime me aleatët e mi, i dëgjoj me vëmendje, i respektoj shumë, përpiqemi vazhdimisht të krijojmë mirëkuptim njëri me tjetrin. Do e gjejmë gjuhën e përbashkët patjetër, mendoj se negociatat janë arti i marrëveshjes”, - tha Berisha.


Debati


Menjëherë pas mbledhjes së kryesisë, kryeministri Berisha ka thirrur në një mbledhje urgjente grupin parlamentar të PD, gjatë së cilës është diskutuar në lidhje me propozimet për reformën zgjedhore dhe ndryshimet në Kushtetutë. Burime brenda grupit shprehen se gjatë mbledhjes së grupit Berisha është njohur dhe me iniciativën e disa deputetëve, Preç Zogaj, Edi Paloka dhe Eris Hoxha, për mbledhjen e firmave, për propozimin e amendamentit kushtetues që presidenti të zgjidhet nga populli.
Ndërkohë, duket se disa nga deputetët që njihen si përkrahës të Topit, kanë replikuar dhe kanë hedhur jo pak kritika në adresë të qeverisjes, mënyrës sesi po bëhen ndryshimet në Kushtetutë, si dhe mungesës së demokracisë brenda partisë, sidomos kur bëhet fjalë për vendimmarrje të rëndishme. Burime nga mbledhja e grupit shprehen se Berisha nuk ka preferuar të replikojë me deputetët, por ka shpjeguar arsyet se përse e çuan në propozimin për amendimin e nenit 84 që bën fjalë për zgjedhjen e presidentit. “I mbani mend vështirësitë që kaluam vitin e kaluar dhe këto situata nuk duhen të përsëriten”, - është shprehur Berisha, Gjithsesi, edhe në mbledhjen e grupit, ai është shprehur se, në rast se do të mund të arrihen 94 vota për zgjedhjen e presidentit, atëherë iniciatorët e vendimmarrjes do të kenë të gjithë mbështetjen e grupit parlamentar të PD.
Në fakt, dje, përpara nisjes së mbledhjes të grupit parlamentar, të PD, ndihej se deputetët, të cilët tashmë janë rreshtuar në krah të presidentit, ishin përgatitur për debat me kryeministrin. Gjithsesi, burime nga grupi parlamentar i PD u shprehën se debati ishte sërish shumë larg nga ajo çka pritej përpara fillimit të tij. Berisha vetëm një ditë më parë ka thirrur në zyrën e tij disa prej deputetëve që njihen si iniciatorë të debateve, përkrahës të presidentit dhe ndoshta kjo ishte dhe një nga arsyet që shumë prej tyre ndenjën pasivë ndaj mbledhjes së grupit. Debati i pritshëm bëri që mbledhja përgjatë tërë kohës të zhvillohej me dyer të mbyllura, në kundërshtim me herët e tjera, kur gazetarët nxirreshin jashtë, pasi Berisha përfundonte fjalën e hapjes.


Mblidhen firmat për zgjedhjen e presidentit nga populli


Deri dje në orët e vona të mbrëmjes, propozimin e amendamentit për zgjedhjen e presidentit nga populli e kanë firmosur gjithsej rreth 30 deputetë nga të gjitha partitë e së djathtës. Në listën e deputetëve firmëtarë vihet re dhe emri i Spiro Peçit, deputet i pavarur, apo dhe emri i Spartak Ngjelës, i cili prej kohësh ka dalë nga grupi parlamentar i PD. Ndërkohë, përkrahësit e presidentit Topi në këtë iniciativë janë të mendimit se listës do i shtohen dhe emra të tjerë dhe vetëm firmëtarë mund të bëhen rreth 50 për qind e numrit të votave që kërkohen për shtimin e këtij amendimi. Por, megjithëse deklarata e kryeministrit ia la në dorë thjesht iniciativës së Kuvendit këtë çështje, sërish asgjë nuk është e pamundur, në rast se listës i shtohen votat e të gjithë aleatëve të PD dhe një pjese të deputetëve të PS, të cilët që në kohën e zgjedhjes së presidentit ishin të mendimit që ky i fundit të zgjidhet nga populli. Ndërkohë që vetëm një ditë më parë, në Komisionin e Ligjeve, ishin dy deputetë të PD, Pal Dajçi dhe Sali Shehu, të cilët votuan kundër zgjedhjes së presidentit me 71 vota. Sali Shehu u shpreh se me kaq vota mund të zgjidhet dhe Avokati i Popullit apo të emërohet një ministër i kabinetit, ndërkohë që posti i presidentit është shumë më i lartë se kaq dhe do një miratim sa më të gjerë. Sa për kompetencat, ata janë të mendimit se dhe me kaq kompetenca sa ka, presidenti e justifikon zgjedhjen e tij nga populli. Nga ana tjetër, vetë Presidenti i Republikës është më se i interesuar që zgjedhja e presidentit të bëhet nga populli, pasi kështu ka mundësinë të kandidojë dhe për një mandat të dytë.